ރާއްޖެއަށް ސިނގިރޭޓް އެތެރެ ކޮށްފައިވަނީ ކުންފުނީގައި މަސައްކަތް ކުރަމުން އަންނަ ބައެއް މުވައްޒަފުން އަމިއްލަ މަންފާއަށް ކަމަށާއި އެފަދަ މުވައްޒަފުންނާ މެދު ފިޔަވަޅު އަޅާފައިވާ ކަމަށް ދަ ހޯކްސް ޕްރައިވެޓް ލިމިޓެޑުން ބުނެފިއެވެ.
ކަސްޓަމްސްއިން އިން ބުނީ ހޯކްސް ޕްރައިވެޓް ލިމިޓެޑްގެ އެޖެންޓްކަމުގެ ދަށުން އޮކްޓޯބަރު 24، 2024 ވަނަ ދުވަހު ރާއްޖެ އައި "އެމްޓީ ހޯކްސް ޖަވާހިރު" ނަމަކަށް ކިޔާ ބޯޓަކުން ގިނަ އަދަދެއްގެ ސިނގިރޭޓް އެތެރެކުރަން އުޅޭކަމުގެ މައުލޫމާތު ލިބުމާއި ގުޅިގެން ބެލިބެލުމުން އެތަނުގައި ހުރި އެކޮމަޑޭޝަނުންނާ، ވޯކްޝޮޕުން މެންޗެސްޓާ ބްރޭންޑުގެ ސިނގިރޭޓު (ގާތްގަނޑަކަށް 1.695 މިލިއަން ސިނގިރޭޓް ސްޓިކްސް) ފެނިފައިވާކަމަށެވެ.
ހޯކްސްގެ ބޯޓަކުން ރާއްޖެއަށް ގިނަ އަދަދެއްގެ ސިނގިރޭޓް އެތެރެ ކޮށްފައިވާ މައްސަލަ ފެންމަތިވުމާއި ގުޅިގެން މިކަން ހިނގި ގޮތް ސާފުކޮށްދިނުމަށް އެ ކުންފުނިން ނެރުނު ބަޔާނުގައި ބުނީ އެކަމުގައި ދަ ހޯކްސްގެ އެއްވެސް ކަހަލަ ބައިވެރިވުމެއް ނެތް ކަމަށެވެ. ދަ ހޯކްސް އިން ބުނީ އެ ކުންފުންޏަކީ ފައިދާކުރުވަނިވި ތެލުގެ ވިޔަފާރިކުރާ ކުންފުންޏަކަށްވާއިރު، ދުންފަތުގެ އިސްތިއުމާލު ކުރުމަށް ބޭނުންކުރާ އެއްވެސް ބާވަތެއް އެތެރެކުރުމުގެ އެއްވެސް ވިޔަފާރިއެއްގައި ބައިވެރިވުމެއް އަދި އެފަދަ އެއްވެސް ޝައުގުވެރިކަމެއް ކުންފުނީގައި ނެތް ކަމަށެވެ.
މީގެ އިތުރުން އެ ބަޔާނުގައި ވަނީ ސިގިނރޭޓް ވަގަށް އެތެރެކުރަން އުޅޭކަމަށް ބުނެ ލިބުނު މައުލޫމާތާއި ގުޅިގެން ދަ ހޯކްސްގެ ބޯޓު ޔާޑަށް ފުލުހުން ހާޒިރުވި ކަމަށާއި އެ ޔާޑަށް ފުލުހުން ހާޒިރުވެ، ބަލައި ފާސްކޮށްފައިވަނީ ބަލާ ފާސްކުރުމުގެ އަމުރެއް ނުވަތަ ކޯޓު އަމުރެއް ނެތި ކަމަށެވެ. އެކުންފުނިން ބުނީ، ކުންފުނީގެ މެނޭޖްމަންޓުން އެކަމުގައި ފުލުހުންނަށް ދޭންޖެހޭ ހުރިހާ އެއްބާރުލުމެއް ދީ ގާނޫނާއި ހިލާފު އަމަލުތަކުގައި ބައިވެރިވެ އެއަމަލުތައް ހިންގާ ފަރާތްތައް ދެނެގަނެ ހައްޔަރުކުރުމަށް ކުރަންޖެހޭ މަސައްކަތް ކުރުމަށް ފުރިހަމަ އެއްބާރުލުން ދީފައިވާނެ ކަމަށެވެ. އަދި ކޯޓު އަމުރު ލިބެން ދެން ފުލުހުން އެތަނުގައި ހަރަކާތްތެރިވުމަށް ފުރުސަތު ދިން ކަމަށްވެސް މި ބަޔާނުގައި ވަނީ ފާހަގަކޮށްފައެވެ.
އިތުރަށް މި ބަޔާނުގައި ވަނީ މި ހާދިސާއާއި ގުޅިގެން ކުންފުނީގެ ފަރާތުން އެމައްސަލަ އިދާރީގޮތުން ތަހުގީގުކުރަން ފަށިކަން ހާމަކޮށްފައެވެ. އެގޮތުން، ކެމެރާ ފުޓޭޖްތައް ބެލިބެލުމުން މިހާތަނަށް ކުންފުނީގެ މުވައްޒަފުންތަކެއްގެ މައްޗަށް އައިރު ގާނޫނީ ހަރަކާތްތަކަކަށް ކުންފުނީގެ ރިސޯސަސް ބޭނުންކޮށް އަމިއްލަ މަންފާ ނަގަން މަސައްކަތްކޮށްފައިވާކަމުގެ ތުހުމަތުކުރެވިފައިވާތީ އެ މުވައްޒަފުން ވަގުތުން މަސައްކަތުން އެކަހެރިކޮށް، ކަމާބެހޭ ތަހުގީގީ އިދާރާތަކަށް އެކަން ރިޕޯޓްކޮށްފައިވާ ކަމަށް މި ބަޔާނުގައި ވަނީ ބުނެފައެވެ.
ތަފާތު 10 ގައުމެއްގެ 900 އަށްވުރެ ގިނަ މުވައްޒަފުން ދަ ހޯކްސްގައި މަސައްކަތް ކުރަމުންދާއިރު، ކުންފުނިން އަބަދުވެސް މަސައްކަތްކޮށްފައިވަނީ މުވައްޒަފުންގެ ލާބައާއި މަންފާއަށްކަން ފާހަގަކޮށް ދަ ހޯކްސް އިން ބުނީ އެހެންނަމަވެސް، ކުންފުނީގެ މަދު މުވައްޒަފުންތަކެއް ބައިވެރިވެ ކުންފުނީގެ މެނޭޖްމަންޓުން މުވައްޒަފުންނާއި މެދު ކުރި އިތުބާރާ ޔަގީންކަން ގެއްލޭގޮތަށް ހިންގާފައިވާ މިއަމަލަކީ ކުންފުންޏަށް ލިބުނު ބޮޑު ހައިރާންކަމެއް ކަމަށެވެ.
އެގޮތުން ކުރިއަތް އޮތް ތަނުގައިވެސް ދަ ހޯކްސްގެ ރިސޯސަސް މިފަދަ ނަހަމަ ގޮތެއްގައި ބޭނުންކުރުން ހުއްޓުވުމުގެ ގޮތުން ކުންފުނީގެ އެތެރޭގެ ކޮންޓްރޯލް ހަރުދަނާކުރުމަށް އިތުރު ފިޔަވަޅުތައް އަޅަމުންދާނެކަމުގެ ޔަގީންކަން ވަނީ ދީފައެވެ. އަދި މިފަދަ ކަންކަމާއި ގުޅިގެން ޒިންމާ ނަގަންޖެހޭ ފަރާތްތަށް ހޯދުމަށް ކުރަންޖެހޭ އެންމެހާ ކަންތައްތައް ކުރުމަށް ގާނޫނު ތަންފީޒުކުރާ އިދާރާތަކަށް ދޭންޖެހޭ ފުރިހަމަ އެއްބާރުލުން ދޭނެ ކަމުގެ ޔަގީންކަން ވެސް އެ ކުންފުނިން ވަނީ ދީފައެވެ.
