އަންނަ އަހަރަށް ލަފާކޮށް ސަރުކާރުން ބުރާސްފަތި ދުވަހު ބަޖެޓު ހުށަހަޅަން ނިންމައިފިއެވެ.
އެކަން ހާމަކުރެއްވީ ޓެކުހާއި ބެހޭ ބިލުތައް ދިރާސާކުރުމަށް ބޭއްވި މާލިއްޔަތު ކޮމިޓީ އާއި އިގްތިސާދީ ކޮމިޓީގެ ސަބްކޮމިޓީގެ ބައްދަލުވުމުގައި، ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހްމަދު ނާޒިމެވެ.
ނާޒިމް ވިދާޅުވީ، ބަޖެޓް ހުށަހަޅާ ޖަލްސާ މި ބުރާސްފަތި ދުވަހު ބާއްވަން ނިންމެވިކަން މަޖިލީހުގެ ރައީސް އަބްދުއްރަހީމް އަބްދުﷲ އަންގަވާފައިވާކަން އަމީންއާންމު ފާތިމަތު ނިއުޝާ އޭނާގެ އަރިހު ރޭ ދަންނަވާފައިވާ ކަމަށެވެ.
ފާހަގަކުރެވޭ ގޮތުގައި ސަރުކާރުގެ ފަރާތުން ވަނީ 5.1 ބިލިއަން ރުފިޔާގެ ސަޕްލެމެންޓަރީ ބަޖެޓެއް މިދިޔަ ބުރާސްފަތި ދުވަހު މަޖިލީހަށް ހުށަހަޅައިފައެވެ. ބަޖެޓް ދިރާސާކުރާ ކޮމިޓީއަށް ކަމާބެހޭ ފަރާތްތައް ހާޒިރުކޮށް، އެ ފަރާތްތަކުގެ ލަފައަށް ފަހު ސަޕްލެމެންޓަރީ ބަޖެޓް ފާސްކުރުމާ މެދު ކޮމިޓީން މާދަމާ ގޮތެއް ނިންމާނެއެވެ.
