ޕީއެންސީއަށް މިހާތަނަށް 65،000 މެންބަރުން ހަމަކުރެވިއްޖެ ކަމަށާއި، މިހާ ގިނަ އަދަދަކަށް މެންބަރުން ޕީއެންސީއަށް ގުޅުމުން އެނގެނީ ސަރުކާރަށް އޮތް ތާއީދު ކަމަށް އެ ޕާޓީގެ ޕާލިމަންޓްރީ ގްރޫޕުގެ ލީޑަރު އިބްރާހިމް ފަލާހު ވިދާޅުވެއްޖެއެވެ.
ޕީއެންސީއަށް މެމްބަޝިޕް އިތުރު ކުރުމަށް މިއަދު މާލޭގައި ބޮޑު ހަރަކާތެއް ހިންގާފައިވާއިރު، ޕީއެންސީގެ ރަސްމީ ހަރުގެއިން އެ ހަރަކާތް ފެށުމުގެ ކުރިން އެ ސަރަހައްދުގައި ނޫސްވެރިންނާ ވާހަކަ ދައްކަވަމުން ފަލާހު ވިދާޅުވީ، ރައީސް މުއިއްޒުގެ އެދިވަޑައިގަތުމުގެ މަތިން އަންނަ މަހުގެ 17ގެ ކުރިން 75،000 މެންބަރުން ޕީއެންސީއަށް ހަމަ ކުރުމުގެ މަސައްކަތް ވަރަށް ބާރަށް ކުރަމުންދާ ކަމަށެވެ.
ރައީސް ޑރ. މުއިއްޒު ވަނީ އަންނަ މަހުގެ 17 އަށް މި ސަރުކާރަށް އެއް އަހަރު ފުރޭއިރު، 75،000 މެންބަރުންނާ އެކު ރާއްޖޭގެ އެންމެ ބޮޑު ޕާޓީއަށް ޕީއެންސީ ހެދުމަށް އަމާޒުހިއްޕަވާފައެވެ.
މިއަދު މާލޭގައި ހިންގި ހަރަކާތާއި ގުޅޭ ގޮތުން ފަލާހު ވިދާޅުވީ މާލޭގައި ހަތް ދާއިރާއަކަށް ބަހާލައިގެން އެ ތަންތަނުގައި ޓީމުތަކުން ހަރަކާތްތެރިވާނެ ކަމަށާއި ރާއްޖޭގެ އެކި ރަށްތަކުގައި ވެސް ފޯމު ފުރުމުގެ މަސައްކަތް ކުރަމުންދާނެ ކަމަށެވެ.
ފާހަގަކޮށްލެވޭ ގޮތުގައި މި ހަރަކާތުގައި ޕީއެންސީއަށް ނިސްބަތްވާ މަޖިލިސް މެންބަރުންނާއި އެ ޕާޓީއަށް ނިސްބަތްވާ ސިޔާސީ ބޭފުޅުން އަދި ސަރުކާރުގެ ސިޔާސީ މަގާމުތަކުގައި އާއި ކުންފުނިތަކުގައި ތިއްބެވި ބޭފުޅުން ވަނީ ބައިވެރިވެވަޑައިގެންފައެވެ.
