ގދ. ނަޑެއްލާގައި ބާރު ދުވެލީގައި ދުއްވާފައި ދިޔަ ސައިކަލެއް ކޮންޓްރޯލުން ނެއްޓިގެން ގޮސް ހިނގި އެކްސިޑެންޓެއްގައި އަނިޔާވި ދެ މީހުން އިތުރު ފަރުވާ އަށް މާލެ ގެނެސްފިއެވެ.
މީޑިއާއަށް ފޮނުވި މެސެޖެއްގައި ފުލުހުން ބުނީ، ނަޑެއްލާގެ ޖެޓީ މަގުން ބާރު ދުވެލީގައި ދުއްވި ސައިކަލެއް ކޮންޓްރޯލްނުވެ، އެ ސަރަހައްދުގައި ޕާކުކޮށްފައި އޮތް ޕިކަޕެއް ކައިރީގައި ހުރި މީހެއްގެ ގައިގައި ޖެހިފައިވާ ކަމުގެ މައުލޫމާތު ރޭ ދަންވަރު 12 ޖަހާކަން ހާއިރު ލިބިފައިވާ ކަމަށެވެ.
މި އެކްސިޑެންޓުގައި ސައިކަލު ދުއްވަން އިން 18 އަހަރުގެ މީހާއަށާއި ފަހަތުގައި އިން 18 އަހަރުގެ މީހާ އަށާއި ޕިކަޕު ކައިރީގައި މަޑުކޮށްގެން ހުރި 47 އަހަރުގެ މީހާ އަށް އަނިޔާވެގެން ތިން މީހުންނަށް ފަރުވާ ދިނުމަށްޓަކައި ތިނަދޫ ސިޓީގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލަށް ގެންގޮސް ފަރުވާ ދީފައިވާ ކަމަށް ފުލުހުން ބުންޏެވެ.
މީގެ ތެރެއިން ސައިކަލު ދުއްވަން އިން މީހާ އާއި ޕިކަޕު ކައިރީގައި ހުރި މީހާ މިއަދު މާލެއަށް ގެނެސް އޭޑީކޭ ހޮސްޕިޓަލުގައި ދެ މީހުންނަށް އިތުރު ފަރުވާ ދެމުންދާ ކަމަށް ވެސް ފުލުހުން ބުންޏެވެ.
އަދި ސައިކަލު ދުއްވި މީހާ އަކީ ލައިސަންސެއް ނެތް މީހެއް ކަމަށް ވެސް ފުލުހުން މައުލޫމާތު ދީފައިވެއެވެ.
ފުލުހުން ދަނީ މި މައްސަލަ އިތުރަށް ބަލައި ތަހްގީގުކުރަމުންނެވެ.
