ދިވެހިބަހާއި ސަގާފަތާ ބެހޭ މިނިސްޓްރީގެ މުވައްޒަފުންނަށް ވަޒީފާގެ މާހައުލުގައި ފުރައްސާރަ އާއި ޖެއްސުން ކުރާކަމަށް ބުނެ އެ މުވައްޒަފުންގެ ފަރާތުން ރައީސް ޑރ. މުހައްމަދު މުއިއްޒު އާއި ބައްދަލުކުރުމަށް އެދިއްޖެއެވެ.
އެ މިނިސްޓްރީގެ މުވައްޒަފުންގެ ފަރާތުން ބުނެފައިވަނީ ދިވެހިބަހާއި ސަގާފަތާ ބެހޭ މިނިސްޓްރީގެ އެކްޓިން ޕާމަނަންޓް ސެކްރެޓަރީ އާތިކާ އިބްރާހިމް އިސްވެ ހުންނަވާ އެ ތަނުގެ ސިވިލް މުވައްޒަފުންނަށް ބުލީ ކުރާ ކަމަށާއި، އެ މައްސަލާގައި އެ މިނިސްޓްރީގެ 22 މުވައްޒަފަކު ސޮއިކޮށް ސިވިލް ސާވިސް ކޮމިޝަން (ސީއެސްސީ) އަށް ޕެޓިޝަނެއް ހުށަހަޅާފައިވާ ކަމަށެވެ.
ނަމަވެސް ސީއެސްސީގެ ބަހެއް ލިބިފައިނުވާކަމަށާއި، މި ޕެޓިޝަން ހުށަހެޅި ފަހުން ވަޒީފާގެ މާހައުލު އިތުރަށް ގޯސްވެފައިވާތީ އެ މުވައްޒަފުން ރައީސް މުއިއްޒަށް މިދިޔަ މަހުގެ 25 ގައި ސިޓީއެއް ފޮނުވި ކަމަށް އެ މުވައްޒަފުން ވަނީ ބުނެފައެވެ.
މުވައްޒަފުން ރައީސް މުއިއްޒަށް ފޮނުވި ސިޓީގައި ވަނީ ބައެއް ސިޔާސީ މުވައްޒަފުން ސިވިލް މުވައްޒަފުންނަށް ބިރު ދައްކާކަމަށާއި މީގެއިތުރުން ދައުލަތުގެ ހަރަދުތައް ކުޑަކުރަން އަންގާފައިވީ ނަމަވެސް އެ މިނިސްޓްރީން އެގޮތަށް އަމަލުނުކުރާ ކަމަށް ބުނެފައެވެ. އަދި މިނިސްޓްރީ އަށް ލިބޭ ބައިނަލްއަގުވާމީ ދައުވަތުތަކާއި ކޮންފަރެންސްތަކާއި ތަމްރީނުތަކަށް ޕޮލިސީ ލެވެލް އިން ގޮތެއް ނިންމައި ނުދޭކަމަށާއި މިކަމުގެ ސަބަބުން އެތައް ފުރުސަތެއް ގެއްލިފައިވާ ކަމަށްވެސް އެ ސިޓީ ގައި މުވައްޒަފުން ވަނީ ފާހަގަކޮށްފައެވެ.
ނަމަވެސް މިދިޔަ މަހު ރައީސް އޮފީހުގައި ބޭއްވި ބައްދަލުވުމެއްގައި ދިވެހިބަހާއި ސަގާފަތާ ބެހޭ މިނިސްޓަރު އާދަމް ނަސީރު ވަނީ އާތިކާގެ މައްޗަށް ކުރި ތުހުމަތުތައް ދޮގުކުރައްވާ އޭނާއަކީ އެ މިނިސްޓްރީގެ މަސައްކަތްތަކަށް ވަރަށް ފަރުވާތެރި އަދި ރަނގަޅަށް މަސައްކަތްކުރާ މުވައްޒަފެއް ކަން ފާހަގަކުރައްވާފައެވެ.
