ހުޅުމާލެ ދެވަނަ ފިޔަވަހީގެ ވިނަރެސް ފުލެޓުތައް ކައިރީ ހިނގި ނުރައްކާތެރި އެކްސިޑެންޓުގައި ކާރު ދުއްވި މީހާގެ މައްޗަށް ދައުލަތުން 6 ދައުވާއެއް އުފުލައިފިއެވެ.
ޖުލައި 31، ގައި ހިނގި މި އެކްސިޑެންޓުގައި، ތިން މީހެއްގެ މައްޗަށް ދައުވާކުރުމަށް ފުލުހުންގެ ފަރާތުން ޕްރޮސެކިއުޓާ ޖެނެރަލް އޮފީހަށް ފޮނުވާފައިވެ އެވެ. އެއީ ހ. ނޫރަންމާގެ، އިކްރާމުއްރަހުމާން އާއި މ. ލޭންޑް އޮފް ގާޑަން، އިބްރާހިމް އިކްރާމްގެ އިތުރުން ގއ. ކަނޑުހުޅުދޫ، އާޒާދުގެ، ޖިނާހު އިސްމާއީލްއެވެ.
މި އެކްސިޑެންޓުގައި ކާރު ދުއްވަން އިން އިބްރާހިމް އިކްރާމްގެ މައްޗަށް ދައުލަތުންކޮށްފައިވަނީ އަނިޔާއެއް ދިނުން، މީހަކު ފަރުވާލެއްނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުން، މުދަލަށް ގެއްލުން ދިނުން، މުދަލަށް ގެއްލުން ދިނުން، އެކްސިޑެންޓްވުމުން އެކަމުގެ ރިޕޯޓު ނުކުރުން، އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށްނުދިނުން، ހިމެނެއެވެ.
މީގެއިތުރުން މި މައްސަލައިގައި އިކްރާމުއްރަހްމާންގެ މައްޗަށް ދައުލަތުން ކުރާ ދައުވާތަކަކީ އެކްސިޑެންޓްވުމުން އެކަމުގެ ރިޕޯޓު ނުކުރުން، އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށްނުދިނުން، އަނިޔާއެއް ދިނުމުގައި ބައިވެރިވުން، މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުވުމުގައި ބައިވެރިވުން ހިމެނެއެވެ. އަދި މުދަލަށް ގެއްލުން ދިނުމުގައި ބައިވެރިވުން، މުދަލަށް ގެއްލުން ދިނުމުގައި ބައިވެރިވުން ހިމެނެއެވެ.
މި މައްސަލައިގައި ދެން ދައުވާކުރާ ޖިނާހު އިސްމާއިލަށް ދައުލަތުން ކުރާ ދައުވާތަކަކީ އަނިޔާއެއް ދިނުމުގައި ބައިވެރިވުން، މީހަކު ފަރުވާލެއްނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގައި ބައިވެރިވުން، މުދަލަށް ގެއްލުން ދިނުމުގައި ބައިވެރިވުން، މުދަލަށް ގެއްލުން ދިނުމުގައި ބައިވެރިވުން ހިމެނެއެވެ.
މި ދައުވާތަށް ކުރުމަށް ފުލުހުންގެ ފަރާތުން ޕީޖީ އޮފީހަށް ފޮނުވާފައިވަނީ ސެޕްޓެމްބަރު 14 ގަ އެެވެ. މި މައްސަލައިގެ އަޑުއެހުމެއް މިއަދަށް ތާވަލުކުރި ނަމަވެސް ފަހުން ވަނީ ކެންސަލްކޮށްފައެވެ. އެހެން ނަމަވެސް, ކެންސަލް ކުރި ސަބަބެއް އިދާރާއަކުން ހާމައެއް ނުކުރެއެވެ.
