ހއ. ދިއްދޫގައި ޖޫނިއާ ކޮލެޖު ބިނާކުރުމުގެ މަސައްކަތުގެ 90 ޕަސެންޓު މަސައްކަތް މިހާރު ނިމިފައިވާކަމަށް މިނިސްޓްރީ އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓުން ބުނެފިއެވެ.
ހަޔާ އެޑިޔުކޭޝަން މިނިސްޓްރީން ބުނީ، މި މަސައްކަތް ނިމި، ހއ.ދިއްދޫގެ ޖޫނިއާ ކޮލެޖްގައި ކިޔަވައިދޭން ފަށާނެކަމަށް ލަފާކުރަނީ 2025 ވަނަ އަހަރު ކަމަށެވެ. އެ މިނިސްޓްރީގެ ފަރާތުން ހއ. ދިއްދޫގައި ގާއިމުކުރާ ޖޫނިއާ ކޮލެޖު އިމާރާތްކުރުމުގެ މަސައްކަތުން ބޮޑު ބައެއް މިހާރު ނިމިފައިވާއިރު ކޮންކްރީޓް ހުރިހާ މަސައްކަތްތަކެއް ނިމިފައިވާކަމަށް މިނިސްޓްރީން ވަނީ ބުނެފައެވެ. އަދި އެތަން ރޭނުމާއި ސިމެންތި ޖެހުމުގެ މަސައްކަތުގެ ބޮޑުބައެއް ވެސް މިހާރު ވަނީ ނިމިފައެވެ.
މީގެ އިތުރުން، މި އިންސްޓިޓިއުޓް ހިންގުމުގެ އިދާރީ މަސައްކަތްތަށް ކުރުމަށް ތައްޔާރުވުމުގެ އިތުރުން ކިޔަވައިދިނުމަށް ބޭނުންވާ އިންތިޒާމުތައް ހަމަޖެއްސުމުގެ މަސައްކަތްތައް ވެސް ކުރަމުން އަންނަކަމަށް މިނިސްޓްރީން ވަނީ ބުނެފައެވެ.
ދިއްދޫގައި ޖޫނިއާ ކޮލެޖެއް އިމާރާތްކޮށް ހިންގާނެ ބަޔަކު ހޯދަން ފިނޭންސް މިނިސްޓްރީން އިއުލާންކުރީ 2021 ވަނަ އަހަރު ޖެނުއަރީ މަސްތެރޭގައެވެ. ވީ އަވަ އިންވެސްޓްމެންޓް ޕްރައިވެޓް ލިމިޓެޑާ ހަވާލުކޮށްގެން ކުރިއަށް ގެންދާ މި މަޝްރޫއުގެ ދަށުން ކިޔަވައިދިނުމަށް ބޭނުންކުރާނެ ކްލާސްރޫމްތަކާ، މަލްޓި-ޕާޕަސް ވޯކްޝޮޕަކާ، އެކޮމަޑޭޝަން ބްލޮކަކާ، އައިސިޓީ އާއި ފުޑް ޕްރޮސެސިން އަދި ފުޑް ޓެސްޓިން ލެބެއް ހެދުމަށް ވަނީ ހަމަޖެހިފައެވެ
މީގެއިތުރުން އިދާރީ ހިދުމަތްތަކަށް ހާއްސަ އޭރިއާއަކާއި ސްޓާފް ރޫމަކާ އޮޑިޓޯރިއަމަކާ، މީޓިން ރޫމްތަކާއި ލައިބްރަރީ ވެސް އެތަނުގައި ހުންނާނެ އެވެ. އަދި ދަރިވަރުންނަށް ތަފާތު ކުޅިވަރުތައް ކުޅެވޭނެ އެކްޓިވިޓީ ސެންޓަރަކާއެކު ޖިމަކާ، ނަމާދުކުރަން ހާއްސަ އޭރިއާ އެއްވެސް ހުންނާނެ އެވެ.
މި ކޮލެޖް ހާއްސަ ކޮށްފައިވަނީ ފުޑް ޕްރޮސެސިން އަދި ޓެކްނޮލޮޖީ ދާއިރާގެ އެކި ލެވެލްތަކުގެ ކޯސްތަށް ހިންގުމަށްކަމަށް މީގެ ކުރިން ހަޔާ އެޑިއުކޭޝަން މިނިސްޓްރީން ވަނި ބުނެފައެވެ. އެހެންނަމަވެސް ތަފާތު އެހެނިހެން ދާއިރާތަކުން ވޮކޭޝަނަލް ކޯސްތައް ވެސް މި އިންސްޓިޓިއުޓުގައި ހިންގުމަށް ވަނީ ނިންމާފައެވެ.
