ހއ. ދިއްދޫ ފުޓުބޯޅަ ދަނޑު ތަރައްގީކުރަން އެމްޓީސީސީއާ ހަވާލުކޮށްފިއެވެ.
މިކަމާ ގުޅިގެން ނެރުނު ބަޔާނެއްގައި އެމްޓީސީސީން ބުނީ ސްޕޯޓްސް މިނިސްޓްރީގައި މިއަދު ބޭއްވި ރަސްމިއްޔާތެއްގައި މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވާފައިވަނީ ޑެޕިއުޓީ މިނިސްޓަރު މުހައްމަދު ފަޔާޒްކަމަށެވެ. އަދ،ި އެމްޓީސީސީގެ ފަރާތުން ސޮއިކުރެއްވާފައިވަނީ އެ ކުންފުނީގެ ޑެޕިއުޓީ މެނޭޖިން ޑިރެކްޓަރު، މުހައްމަދު ޖަމްޝީދުކަމަށެވެ.
އެމްޓީސީސީން ބުނީ މި މަޝްރޫއުގެ ދަށުން ދިއްދޫ ފުޓުބޯޅަ ދަނޑުގެ ސަބްބޭސް ތައްޔާރުކުރުމާއި، ޕިޗު ހަދާ ބައުންޑަރީ ފާރު އިމާރާތްކުރުމުގެ އިތުރުން ފެންސްޖަހައި އަދި ލައިޓިން ސިސްޓަމް ހަރުކުރުމުގެ މަސައްކަތް ކުރެވިގެންދާނެ ކަމަށެވެ. މީގެއިތުރުން ރޮސްޓްރޮމްއެއްވެސް ހެދިގެންދާނެ ކަމަށް އެމްޓީސީސީން ވަނީ ބުނެފައެވެ.
މި މަޝްރޫއަކީ 28.50 މިލިއަން ރުފިޔާއަށް 360 ދުވަސްތެރޭ ނިންމުމަށް އެ ކުންފުންޏާއި ހަވާލުކޮށްފައިވާ މަޝްރޫއެއްކަމަށްވެސް އެމްޓީސީސީން ވަނީ ބުނެފައެވެ.
އެމްޓީސީސީން ބުނީ 4186 މީހުންގެ އާބާދީއެއް އޮންނަ ދިއްދޫގައި ފުޓްބޯޅަ ދަނޑު ތަރައްގީކުރުމުގެ މަޝްރޫއުގެ މަސައްކަތް ނިމުމާއެކު ރައްޔިތުންނަށް ސިއްހީ ގޮތުންނާއި އިޖުތިމާޢީއީ ގޮތުން ގިނަ ފަސޭހަތަކެއް ލިބިގެންގެންދާނެ ކަމަށެވެ.
