މަޝްހޫރު ސިނަމަޓޯގްރާފަރު ހަސަން ހަލީމު (ކޮކޯ) ޑައިރެކްޓްކޮށް ގެނެސްދޭ ފިލްމު "ގެއްލުނު ރޭ' މި މަހު 29 ވަނަ ދުވަހު އޮލިމްޕަހުގައި ޕްރިމިއާކުރާ ގޮތަށް ހަމަޖެހިއްޖެއެވެ.
ފިލްމު އިއުލާން ކުރާ ތާރީހާއެކު ވަނީ މި ފިލްމުގެ ޓްރެއިލާއެއްވެސް އާންމުންނާ ހަމައަށް ދޫކޮށްލާފައެވެ. "ދެރިޔާ" އާއި "އަމާނާތް" އަދި "ލަސްވިޔަސް" ފަދަ ފިލްމުތަކުގެ ކެމެރާމަންކަން ކޮށްފައިވާ ކޮކޯގެ އަލަތު ޑައިރެކްޝަނުގެ ޕޯސްޓަރުވެސް ވަނީ ދައްކާލަައިފައެވެ. ބިރުވެރި ޖޯންރާއަކަށް ބިނާކޮށް ތައްޔާރުކޮށްފައިވާ މި ފިލްމުގެ ތަރިންނަކީ މުހައްމަދު މަނިކު، އައިމިނަތު ޝުހާ، އިބްރާހީމް ޖިހާދު (ޖިމީ)، މަރިޔަމް ޝިފާ، މަރިޔަމް ހަލީމް އަދި އަލަށް ފިލްމީދާއިރާއަށް ތައާރަފުކުރާ ކުޑަކުއްޖާ ކައުސަރެވެ. "ގެއްލުނު ރޭ" އަކީ ކޮކޯގެ ދަރިފުޅު އަދި ލަވަކިޔުންތެރިޔާ އަންދަލާ ހަލީމް ޕްރޮޑިއުސްކޮށް، ރިޝްތާގެ ސްކްރީންޕްލޭއަކަށް ތައްޔާރުކޮށްފައިވާ ފިލްމެކެވެ.
މިއަހަރަކީ އޮލިމްޕަހަށް ދިވެހި ފިލްމު ތިޔާގި އަހަރެކެވެ. އަހަރު ފެށުނީއްސުރެ ފުލުފުލުގައި އޮލިމްޕަހުގައި ދިވެހި ފިލްމު އަޅުވަމުން އަންނައިރު މިރޭ ވެސް ވަނީ އޮލިމްޕަހުގައި ފިލްމެއް ޕްރިމިއާކުރުމަށް ނިންމާފައެވެ. އެއީ "ބިބީ" އެވެ. އެ ފިލްމަށްފަހު އޮލިމްޕަހުގައި ދެން އެންމެ އަވަހަށް އަޅުވާނީ ކޮކޯ ގެ "ގެއްލުނު ރޭ" އެވެ.
