އެއްލައިލި ސިނގިރޭޓު ފޮއްޓެއްގެ ތެރެއިން ގިނަ އަދަދެއްގެ މަސްތުވާތަކެތި ފެނުނު މައްސަލައިގައި މީހަކު އުމުރަށް ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މި މައްސަލައިގައި ޑައިފޯމިން ޓުރެފިކުކުރުމުގެ ކުށުގެ ދައުވާ އުފުލީ ޙަސަން ސިފާހު، މއ. ސިޓީވިލާ، ކ. މާލެ، އަށެވެ.
ހަސަން ސިފާހުގެ މައްޗަށް ދައުލަތުން ކުރި ދައުވާގައި ބުނީ ފެބްރުއަރީ 7، 2022 ވަނަ ދުވަހުގެ ރޭ އޭނާ އާއި އިތުރު މީހަކު ސައިކަލުގައި ދުއްވަމުން ދަނިކޮށް، ސައިކަލުގެ ލޯގަނޑު ރަނގަޅު ކުރަން ފުލުހުން ސައިކަލު ހުއްޓުވި ކަމަށެވެ. އަދި ސައިކަލު ހުއްޓުވުމުން ސިފާހު ސައިކަލުން ފައިބައިގެން އެތަނުން ދާން ފެށުމުން ފުލުހުން އޭނާއަށް ގޮވުމުން އޭނާ މަގުމައްޗަށް ސިގިރޭޓު ފޮއްޓެއް އެއްލާލާފައި ދުއްވައިގަތް ކަމަށް އެ ދައުވާގައި ވަނީ ބުނެފައެވެ.
އެ ސިނގިރޭޓު ފޮށި ބަލައި ފާސްކުރިއިރު އޭގެ ތެރޭގައި 95 ޕެކެޓުގައި ޖުމުލަ 9.3124 ގްރާމްގެ ޑައިފޯމިން ހުރިކަމަށް ދައުވާގައި ވަނީ ބުނެފައެވެ.
މި މައްސަލައިގައި އޭނާ ކުށަށް އިންކާރުކޮށް، ކްރިމިނަލް ކޯޓުގައި ބުނެފައި ވަނީ ދައުވާގައި ބުނާ ފަދަ ކުށުގެ އެއްވެސް އަމަލެއް ނުކުރާ ކަމަށެވެ. އަދި މަގުމައްޗަށް ސިގިރޭޓު ފޮއްޓެއް އެއްލާނުލާ ކަމަށާއި ފުލުހުން ބުނާ ފޮއްޓަކީ އޭނާއާ ގުޅުންހުރި އެއްޗެއް ނޫން ކަމަށް ކޯޓުގައިވަނީ ބުނެފައެވެ. އެހެން ނަމަވެސް، އޭނާގެ ފަރާތުން ދިފާއީ ހެކި ހުށަހަޅާފައި ނުވެއެވެ.
ސިފާހުގެ މައްޗަށް އުފުލާފައިވާ ޑައިފޯމިން ޓުރެފިކުކުރުމުގެ ކުށުގެ ދައުވާ ސާބިތުވާ ކަމަށް ކްރިމިނަލް ކޯޓުން ކުރި ކުރި ހުކުމުގައިވަނީ އޭނާ އުމުރަށް ޖަލަށްލުމާ އެކު 100،000 ރުފިޔާއިން ޖޫރިމަނާކޮށް އެ ފައިސާ 12 މަސް ދުވަހުގެ ތެރޭގައި ދައްކައި ހަލާސްކުރަން ހުކުމްކޮށްފައެވެ.
މި މައްސަލައިގައި އޭނާ ޖަލުގައި ހޭދަކޮށްފައިވާ މުއްދަތު ހުކުމުން އުނިކުރުމުން އޭނާ ތަންފީޒު ކުރަންޖެހޭނީ 24 އަހަރާއި 11 މަސް ދުވަހުގެ ޖަލު އަދަބެކެވެ.
