ބީއެމްއެލްގެ ޑެޕިއުޓީ ސީއީއޯގެ މަގާމުގައި ހުންނެވި އައިޝަތު ނޫރައްދީން އެ ބޭންކުގެ ބޯޑު މެންބަރު ކަމުން އިސްތިއުފާ ދެއްވައިފިއެވެ.
އާދިއްތަ ދުވަހު އައިޝަތު ނޫރައްދީން މަގާމުން އިސްތިއުފާދެއްވާފައި މިވަނީ، އޭނާ ބޯޑު މެންބަރުކަމުން ވަކިކޮށްފައިވާ ކަމަށް ސަރުކާރުގެ ކުންފުނިތައް ބަލަހައްޓާ ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) އިން މިދިޔަ ހަފްތާގެ ބުރާސްފަތި ދުވަހު ސިޓީއެއް ފޮނުވާފައި ވަނިކޮށެވެ.
ބީއެމްއެލްގެ ޗާޓަރު ބުނާ ގޮތުން އެ ބޭންކަކީ އާންމު ރައްޔިތުން ވެސް ހިއްސާވާ ކުންފުންޏަކަށްވާއިރު އެ ބޭންކުގެ ބޯޑް ޑިރެކްޓަރުން ވަކިކުރެވެނީ ހިއްސާދާރުންގެ އާންމު ޖަލްސާއަކުންނެވެ. އެހެންކަމުން ބީއެމްއެލްގެ ބޯޑު މެންބަރުކަމުން އައިޝަތު ނޫރައްދީން ވަކިކުރުމަށް ޕީސީބީން ސިޓީއެއް ފޮނުވި ނަމަވެސް، އެގޮތަށް ބޯޑު މެންބަރުން ވަކި ކުރާކަށް އެ ބޭންކުގެ ހިންގާ ގަވާއިދު ތަނެއް ނުދެއެވެ.
ބީއެމްއެލްގެ ހިންގާ ގަވާއިދުގައި ބޭންކުގެ ޑިރެކްޓަރުންގެ ބޯޑު އެކުލެވިގެންވާ ގޮތާ، ޑިރެކްޓަރުންގެ މަގާމުގެ މުއްދަތާ، އެ މުއްދަތު ހަމަނުވަނީސް ޑިރެކްޓަރުން މުސްކުޅި ކުރުމާ، ވަކިކުރުމުގެ ހަމަތައް ބަޔާންކޮށްފައިވެއެވެ.
