ޑޮލަރު ނުދޭން ނިންމި ނިންމުން ބީއެމްއެލް އިން ބަދަލު ކޮށް ކުރިން އޮތް ގޮތަށް ހަދައިފިއެވެ.ގައުމީ ބޭންކުން ދެންމެ ނެރުނު ބަޔާނެއްގައި ބުނީ، މިއަދު އިއުލާން ކުރި ރާއްޖެ އިން ބޭރުގެ މުއާމަލާތް ކުރެވޭ ލިމިޓްތަކަށް ގެނެވުނު ބަދަލުތައް ބޭންކްގެ ރެގިއުލޭޓާ މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ އިރުޝާދަށް ބަލައި މިހާރު އަނބުރާ ގެނެސްފައިވާ ކަމަށެވެ.އެއާއެކު ބީއެމްއެލްގެ ރުފިޔާ އެކައުންޓުތަކަށް ދޫކޮށްފައިވާ ޑެބިޓް ކާޑްތަކާއި ކްރެޑިޓް ކާޑުތަކުން ރާއްޖެއިން ބޭރުގެ މުއާމަލާތް މިހާރު ކުރެވޭނެއެވެ. އެގޮތުން ޑެބިޓް ކާޑުތަކުން ބޭންކް ރޭޓްގައި 250 ޑޮލަރު ބޭނުން ކުރެވޭނެއެވެ. ކްލާސިކް އަދި ގޯލްޑް ކާޑުތަކުން 750 ޑޮލަރު ބޭނުން ކުރެވޭއިރު ޕްލެޓިނަމް ކާޑުތަކުން 1500 ޑޮލަރު ބޭނުން ކުރެވޭނެއެވެ. ބޭންކުން ދޫކުރާ ޑެބިޓް ކާޑާ ގުޅިފައިވާ މައި އެކައުންޓަކީ ރުފިޔާ އެކައުންޓެއް ނަމަ، މިއަދުން ފެށިގެން އެ ކާޑުތަކުން ޑޮލަރެއް ނުކެނޑޭނެ ކަމަށް ނިންމާ އެކަން އިއުލާން ކުރީ މިއަދު ހެނދުނުގެ ވަގުތެއްގައެވެ. މި ބަދަލު ގެނެސްފައިވަނީ ކާޑުން ކުރެވޭ ބޭރުގެ މުއާމަލާތްތަކުގެ އަދަދު ދުވަހުން ދުވަހަށް އިތުރުވަމުން ދިޔަ ނަމަވެސް ބޭންކަށް ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓުމަށް ކަމަށް ބީއެމްއެލް އިން ބުނެއެވެ. ބޭންކުންގެ އެ ނިންމުމާމެދު އާންމުންނާއި ކުދި އަދި މެދު ފަންތީގެ ވިޔަފާރިތައް ކުރަމުންދިޔަ އެތައް ބަޔަކު ވަނީ ކަންބޮޑުވުން ފާޅުކޮށް އެކި މަންސަ ތަކުގައި އަޑު އުފުލާފައެވެ.އެގޮތުން އެ ނިންމުމާ ދެކޮޅަށް ހިޔާލުފާޅު ކުރި ބައެއް މީހުން ބުނީ މި ސަރުކާރުން ވެރިކަމަށް އައުމަށް ވީ ވައުދުތައް ފުއްދުމުގައި ފެއިލްވެފައިވާ ކަމަށެވެ. އަދި މިފަދަ ކުއްލި ބަދަލެއްގެ ސަބަބުން ދަރިވަރުންނަށް އޭގެ އުނދަގޫ ފޯރާފައިވާތީ އެކަމާވެސް ގިނަބަޔަކު ވަނީ ނުރުހުން ފާޅުކޮށްފައެވެ.

ހަބަރު ބީއެމްއެލް