މިއަދުން ފެށިގެން ބޭރު ގައުމުތަކުގައި ކިޔަވާ ދަރިވަރުންނަށް ރުފިޔާ އެކައުންޓުން ޑޮލަރު ނުކެނޑޭނެ ކަމަށް، ބޭންކް އޮފް މޯލްޑިވްސް، ބީއެމްއެލުން ބުނެފިއެވެ.
އެކަން ހާމަކޮށް މިއަދު ނެރުނު ބަޔާނެއްގައި ބީއެމްއެލުން ބުނީ، ބޭންކުން ދޫކުރާ ޑެބިޓް ކާޑާ ގުޅިފައިވާ މައި އެކައުންޓަކީ ރުފިޔާ އެކައުންޓެއް ނަމަ، މިއަދުން ފެށިގެން އެ ކާޑުތަކުން ޑޮލަރެއް ނުކެނޑޭނެ ކަމަށެވެ. އެ ބަޔާން ނެރުނު ވަގުތުން ފެށިގެން ބީއެމްއެލުން ވަނީ ގެނައި ބަދަލުތައް ތަންފީޒުކުރަން ފަށައިފައެވެ.
މި ބަދަލު ގެނެސްފައިވަނީ ބީއެމްއެލުން ބުނި ގޮތުގައި، ކާޑުން ކުރެވޭ ބޭރުގެ މުއާމަލާތްތަކުގެ އަދަދު ދުވަހުން ދުވަހަށް އިތުރުވަމުން ދިޔަ ނަމަވެސް ބޭންކަށް ގަންނަން ލިބޭ ބޭރު ފައިސާގެ އަދަދު އެއް މިންވަރެއްގައި ހިފެހެއްޓިފައި ވާތީއެވެ.
އެގޮތުން ބީއެމްއެލުން މިއަދު ގެނައި ބަދަލުތަކަކީ:
- މިހާރު ދޫކޮށްފައިވާ ޑެބިޓް ކާޑުތަކާއި އަލަށް ދޫކުރާ ޑެބިޓް ކާޑުތަކުގެ މައި އެކައުންޓަކީ ރުފިޔާ އެކައުންޓް ނަމަ، އެ ކާޑުތަކުން ޑޮލަރުން މުއާމަލާތް ނުކުރެވޭ ގޮތް ހެދުން
- މިހާރު ދޫކޮށްފައިވާ ސްޓޭންޑަޑް އަދި ގޯލްޑް ކްރެޑިޓް ކާޑުތަކުން މަހެއްގެ މައްޗަށް ޑޮލަރުން ކުރެވޭ މުއާމަލާތްތައް 100 ޑޮލަރަށް ދަށްކުރުން
މި ބަދަލާ ގުޅޭ ގޮތުން ބީއެމްއެލްގެ ސީއީއޯ އަދި މެނޭޖިން ޑިރެކްޓަރު ކާލް ސްޓުމްކާ ވިދާޅުވީ، މި އަހަރުތެރޭ ކަސްޓަމަރުން އަތުން ބޭންކަށް ގަންނަން ލިބުނީ ގާތްގަނޑަކަށް 60 މިލިއަން ޑޮލަރު ކަމަށާއި، ނަމަވެސް ކާޑުތަކުން ކުރެވުނު މުއާމަލާތްތަކުގެ އަދަދު މީގެ ތިން ގުނަ ބޮޑު ކަމަށެވެ.
މި ބަދަލާ ގުޅިގެން ބޭރު ގައުމުތަކުގައި ކިޔަވާ ދަރިވަރުން ދަނީ މީސްމީޑިއާގައި ކަންބޮޑުވުން ފާޅުކުރަމުންނެވެ.
މިކަމާ ގުޅިގެން ބީއެމްއެލްގެ އިތުރު ބަހެއް އަދި ނުލިބެއެވެ.
