ބީއެމްއެލްގެ ޑެޕިއުޓީ ސީއީއޯގެ މަގާމުގައި ހުންނެވި އައިޝަތު ނޫރައްދީން އެ ބޭންކުގެ ބޯޑު މެންބަރު ކަމުން ވަކިކޮށްފިއެވެ.
ސަރުކާރުގެ ކުންފުނިތައް ބަލަހައްޓާ، ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ) މިކަން އަންގާ އައިޝަތު ނޫރައްދީން އަށް ސިޓީއެއް ފޮނުވާފައިވަނީ މިދިޔަ ހަފްތާގެ ބުރާސްފަތި ދުވަހުއެވެ. އޭނާ ވަނީ ބީއެމްއެލްއަށް 42 އަހަރު ހިދުމަތް ކުރައްވާފައެވެ.
މިދިޔަ ޖެނުއަރީގައި ވެސް ޕީސީބީން ބީއެމްއެލްގެ ފަސް ޑިރެކްޓަރަކު މަގާމުން ވަކިކޮށްފައިވާއިރު، އޭރު އެގޮތަށް އަމަލު ކުރެވިދާނެ ކަމާ މެދު ގާނޫނީ ސުވާލުތައް ކުރިމަތިވެ ޕީސީބީން ފަހުން ވަނީ އެ ނިންމުން ބާތިލުކޮށްފައެވެ. އަދި އެ ފަސް ބޭފުޅުން ފަހުން އެ މަގާމުން ވަކިކޮށްފައިވަނީ ހިއްސާދާރުންގެ އާންމު ޖަލްސާއަކުންނެވެ.
ބީއެމްއެލްގެ ޗާޓަރު ބުނާ ގޮތުން އެ ބޭންކަކީ އާންމު ރައްޔިތުން ވެސް ހިއްސާވާ ކުންފުންޏަކަށްވާއިރު އެ ބޭންކުގެ ބޯޑް ޑިރެކްޓަރުން ވަކިކުރެވެނީ ހިއްސާދާރުންގެ އާންމު ޖަލްސާއަކުންނެވެ.
