މީހަކު ރަނީހުނުކޮށް އިނގިލި ބުރިކޮށްލި މައްސަލައިގައި ތުހުމަތު ކުރެވޭ އިތުރު މީހަކު ހައްޔަރުކޮށްފިއެވެ.
މި މައްސަލައާ ގުޅިގެން މިފަހަރު ހައްޔަރުކޮށްފައި ވަނީ އުމުރުން 23 އަހަރުގެ ދިވެހި ފިރިހެނެކެވެ.
މި މައްސަލައިގެ ތަހުގީގު ނިމެންދެން އޭނާ ބަންދުގައ ބެހެއްޓުމަށް ކްރިމިނަލް ކޯޓުން ވަނީ އަމުރު ނެރެފައެވެ. ކޯޓު އަމުރުގައި ބުނެފައި ވަނީ އަނިޔާ ލިބުނު މީހާ ހައްޔަރުކޮށް އިނގިލި ބުރިކޮށްލުމުގައި އޭނާ ބައިވެރިވެފައިވާ ކަމަށެވެ.
މި މައްސަލައާ ގުޅިގެން މީގެ ކުރިން ވަނީ 3 މީހަކު ހައްޔަރުކޮށްފައެވެ. އެއީ 18 އަހަރުގެ ފިރިހެނަކާއި 21 އަހަރު އަދި 23 އަހަރުގެ ދިވެހި ފިރިހެނުންނެވެ. މި 3 މީހުން ވެސް ޝަރީއަތް ނިމެންދެން ބަންދުކުރުމަށް ކްރިމިނަލްކޯޓުން ވަނީ އަމުރު ކޮށްފައެވެ.
މިހާތަނަށް މި މައްސަލާގައި ޖުމްލަ 4 މީހަކު ހައްޔަރުކޮށްފައި ވާއިރު، މި މީހުންގެ މައްޗަށް ކުރެވެނީ އެއީ ތޫނު ހަތިޔާރު ބޭނުން ކޮށްގެން މާރާމާރީ ހިންގުން، ޖެހުން އަދި ހުއްދަ ނޫންގޮތުގައި މީހަކު ހިފެހެއްޓުމުގެ ކުށުގެ ތުހުމަތެވެ. އަދި މި މީހުން މި ކުށްތަށް ކުރި ކަމަށް ތުހުމަތު ކުރެވޭ މިންވަރަށް ހެކި ހުށަހަޅާފައިވާ ކަމަށް ކޯޓު އަމުރުގައި ބުނެފައި ވެއެވެ.
އެގޮތުން ތަހުގީގު ބަޔާންތަކާއި ސީސީޓީވީ ފުޓޭޖުގެ ސްނެޕްޝޮޓުތަކާއި އަނިޔާ ލިބުނު ފަރާތަށް ލިބިފައިވާ އަނިޔާތަށް ފެންނަ ފޮޓޯތަކާއި އިންޓެލިޖެންސް ރިޕޯޓް އަދި އެ ނޫން ވެސް ހެކި ހުށަހަޅާފައިވާ ކަމަށް ކްރިމިނަލް ކޯޓުގެ އަމުރުގައި ވެއެވެ
އަނިޔާ ލިބުނު ފަރާތަކީ ފުރަތަމަ ހައްޔަރު ކުރެވުނު 3 މީހުންނާއެކު މަސައްކަތްކުރި މީހެއް ކަމަށް ކޯޓު އަމުރުގައި ބުނެފައި ވާއިރު، އޭނާ ރަހީނުކޮށްފައި ނުވާނެ ކަމަށް އެ މީހުން ވަނީ ބުނެފައެވެ. އަދި އެ މީހާގެ އިނގިލި ބުރި ނުކުރާ ކަމަށާއި ޕަވާޓޫލެއް ބޭނުން ކުރަނިކޮށް އަނިޔާ ލިބުނީ ކަމަށް ބުނެ އެ ތުހުމަތަށް މި މީހުން ވަނީ އިންކާރުކޮށްފައެވެ.
އެހެން ނަމަވެސް އަނިޔާ ލިބުނު ފަރާތުގެ ފޮޓޯތަކަށް ބަލާއިރު ޖިސްމާނީ އަނިޔާ ގަސްދުގައި ދީފައިވާކަމަށް ބެލެވޭ ކަމަށް ކޯޓު އަމުރުގައިވެއެވެ. އަދި ޖިސްމާނީ އަނިޔާ ދީފައިވާކަމަށް ބެލެވޭ ހެކި ހުށަހަޅާފައިވާކަން އެ އަމުރުގައި ފާހަގަކޮށްފައިވެއެވެ.
