މޯލްޑިވްސް އެކްސްޕޯ 2025ގައި ބައިވެރި ކުރާ އާ އީޖާދުތަކަށް މާލީ އެހީ ދޭން ނިންމާފައިވާ ކަމަށް އިކޮނޮމިކް މިނިސްޓްރީިއިން ބުނެފިއެވެ.
އިކޮނޮމިކް މިނިސްޓްރީއިން ބުނީ އާ އީޖާދުތަކަށް މާލީ އެހީތެރިކަން ދޭން ނިންމާފައި ވަނީ އާ އީޖާދުތައް އުފެއްދުމަށް ހިތްވަރު ދިނުމުގެ ގޮތުން ކަމަށެވެ. އަދި އެފަދަ އީޖާދުތައް ކުރާ ފަރާތްތަކަށް ކަނޑައެޅޭ އުސޫލެއްގެ ތެރެއިން، ރިސާޗް ގްރާންޓް ފަންޑުން އެހީތެރިކަން ދިނުމަށް ނިންމާފައިވާ ކަމަށެވެ.
"ދިވެހީންގެ އުފެއްދުންތެރިކަމުގެ މައުރަޒު" ނުވަތަ މޯލްޑިވްސް އެކްސްޕޯ 2025އަކީ ދިވެހިރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާކުރުމުގެ މަގްސަދުގައި ވިޔަފާރި އަދި އުފެއްދުންތެރިކަމަށް އަމާޒުކޮށް ބާއްވާ މައުރަޒެކެވެ.
މި މައުރަޒު ބޭއްވުމަށް ހަމަޖެހިފައި ވަނީ އަންނަ އަހަރުގެ މެއި މަހުގެ 23 އިން 31 އަށް ހުޅުމާލޭގައި ކަމަށް އޮކޮނޮމިކް މިނިސްޓްރީއިން ބުނެއެވެ.
މި މައުރަޒުގެ ވާދަކުރުމުގެ ބައިގައި ބައިވެރިވެވޭނީ:
- އަމިއްލަ ފުރުދުން
- ކުންފުނިތަކާއި ވިޔަފާރިތައް
- ރަށްތައް
- ސިޓީތައް
- ތައުލީމުދޭ މަރުކަޒުތައް
- ހާއްސަ އެހީއަށް ބޭނުންވާ ފަރާތްތައް
އިކޮނޮމިކް މިނިސްޓްރީއިން ބުނީ މި މައުރަޒުގައި 81 ގިންތިއަކުން ވާދަކުރުމަށް ހުޅުވާލުމަށް ހަމަޖެހިފައިވާ ކަމަށެވެ. އަދި ހުޅުވާލެވޭ ގިންތިތައް މިހާރު އާންމުކޮށްފައި ވާއިރު، މައުރަޒުގައި ބައިވެރިވުމުގެ މުއްދަތާއި މައުރަޒުގައި ބައިވެރިވުމަށް އަމަލުކުރަން ޖެހޭ ގޮތް ވަރަށް އަވަހަށް އިއުލާނު ކުރާނެ ކަމަށް ވެސް އެ މިނިސްޓްރީއިން ވަނީ ބުނެފައެވެ.
މި މައުރަޒުގައި ވާދަކުރުމުގެ ބައިގެ އިތުރުން، ކްރިއޭޓީވް އިކޮނޮމީ ޑިސްޓްރިކްޓަކާއި، ޑިޖިޓަލް އެންޑް އިނޮވޭޓިވް ޑިސްޓްރިކްޓަކާއި، އެންޓަޓެއިންމަންޓް ޑިސްޓްރިކްޓް އަދި މާކެޓް ޕްލޭސް ޑިސްޓްރިކްޓެއް ހިމެނޭނެ ކަމަށް ވެސް އިކޮނޮމިކް މިނިސްޓްރީއިން ބުނެއެވެ.
މީގެއިތުރުން، ބައިނަލްއަގްވާމީ ބައިވެރިންނަށް މައުރަޒުގައި ބައިވެރިވުމަށް ފުރުސަތުދީ، އެކި ގައުމުތަކުގެ އިޖާދީ މަސައްކަތްތައް ބައިވެރިކުރުމުގެ ފުރުސަތުތައް ހުޅުވާލުމަށް ހަމަޖެހިފައިވާ ކަމަށް ވެސް މިނިސްޓްރީއިން ބުނެއެވެ.
