ރައީސް އޮފީހުގެ މިނިސްޓަރު އަދި ރައީސް ޑރ. މުހައްމަދު މުއިއްޒާ ކުރިން އެންމެ ގާތް ބޭފުޅާ އާދަމް ރަމީޒް މަގާމުން ވަކިކޮށްފިއެވެ.
ސަރުކާރުން ބަލަމުންދާ މައްސަލައަކާ ގުޅިގެން ރަމީޒް މަގާމުން އެކަހެރިކުރީ މިދިޔަ ޖޫން މަހުގެ ފަހުކޮޅުގައެވެ. އެކަމަކު އެއީ ސީދާ ކޮން މައްސަލައެއްކަން ރައީސް އޮފީހުގެ ތަރުޖަމާނު ހީނާ ވަލީދު އޭރު ވިދާޅެއްނުވެއެވެ.
ބެލެވޭ ގޮތުގައި ރަމީޒްގެ އިތުރުން އޭނާގެ ކުރީގެ އަނބިކަނބަލުން، އަދި ތިމާވެއްޓާ ބެހޭ ވުޒާރާގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމް މަގާމުން އެކަހެރިކުރީ ރައީސްގެ ދެކަނބަލުންނަށް ސިހުރު ހަދަން އުޅުނުކަމުގެ މައްސަލައާ ގުޅިގެންނެވެ.
ރައީސް އޮފީހުގެ ވެބްސައިޓްގައިވާ ގޮތުން، ރަމީޒްގެ ނަމާއި ފޮޓޯ ވެސް ވަނީ ނަގައިފައެވެ.
އޭނާ މަގާމުން ވަކިކުރިކަން އިސްތަރުޖަމާނު ހީނާ ވަލީދު ވަނީ ކަށަވަރުކޮށްދެއްވައިފައެވެ.
