މާދަމާ ސަރުކާރު ބަންދު ކުރި ކަމުގައި ވިޔަސް ބޭންކް އޮފް މޯލްޑިވްސް (ބީއެމްއެލް) ގެ ބްރާންޗްތަކާއި ސާވިސް ސެންޓަރުތައް ހުޅުވާފައި ހުންނާނެ ކަމަށް އެ ބޭންކުން ބުނެފިއެވެ.
ބީއެމްއެލް އިން ބުނީ، އެ ބޭންކުގެ ބްރާންޗުތަކާއި ސާވިސް ސެންޓަރުތަކުން މާދަމާ ހިދުމަތް ދޭނީ އާންމުކޮށް ބޭންކުގެ ހިދުމަތްތައް ދޭ ވަގުތުތަކުގައި ކަމަށެވެ.
މާދަމާ ސަރުކާރު ބަންދުކޮށްފައި ވަނީ މިހާރު ރާއްޖެއަށް ކުރަމުންދާ ވިއްސާރައިގައި ސްކޫލަށް ދާ ކުދިންނާއި ވަޒީފާއަށް ދާ މީހުންނަށް ދަތުރުފަތުރު ކުރުމުގައި އާއި ހިނގާބިންގާވެ އުޅުމަށް ދަތިވާނެތީ ލުއި ގޮތެއް ހޯދައިދިނުމުގެ މަގްސަދުގައި ކަމަށް ސަރުކާރުން ވަނީ ބުނެފައެވެ.
މާދަމާ ސަރުކާރު ބަންދުވުމާ ގުޅިގެން އައިޖީއެމްއެޗް އާއި ދަރުމަވަންތަ ހޮސްޕިޓަލް އަދި ވިލިމާލެ ހޮސްޕިޓަލްގައި ސްޕެޝަލިސްޓް އޯޕީޑީގެ ހިދުމަތާއި އެހެނިހެން ކްލިނިކަލް ހިދުމަތްތައް ބަންދުވާނެ ކަމަށް ވަނީ ބުނެފައެވެ. ނަމަވެސް އެ ހޮސްޕިޓަލްތަކުން 24 ގަޑިއިރު އެމްޖެންސީ ހިދުމަތް ދޭނެ ކަމަށް ބުނެފައި ވެއެވެ.
މިހާރު ރާއްޖެއަށް ކުރަމުން އަންނަ ވިއްސާރައިގައި މިއަދު މާލޭގައި ވަރަށް ބޮޑަށް ފެންބިޑުވެ މަގުމަތީގައި ހިނގާބިނގާވެ އުޅުމަށާއި އުޅަނދުތަކުގައި ދަތުރުފަތުރު ކުރުމަށް ވަނީ ހުރަސްތަކާ ކުރިމަތިލާން ޖެހިފައެވެ. މަގުތަކުގެ ފެންބޮޑުވެ ގޭގެއަށް ފެންވަދެ އެތައް އާއިލާއެއް ހާލުގައި ޖެހިފައިވާ އިރު އެ ފަދަ އާއިލާތަކަށް އެހީތެރިވުމަށް ސަރުކާރުން އަންނަނީ މަސައްކަތް ކުރަމުންނެވެ.
މި ވަގުތު ރާއްޖޭގެ މި ހާލަތުން ރައްޔިތުންނަށް އެހީތެރިކަން ފޯރުކޮށް ދިނުމަށް ރައީސް ޑރ. މުހައްމަދު މުއިއްޒު އިސްވެ ހުންނަވައިގެން ވަނީ ހާއްސަ ޓަށްކް ފޯހެއްވެސް އެކުލަވާލާފައެވެ. އަދި ފުލުހުންގެ އޮޕަރޭޝަނަލް ލެވަލް ވެސް ވަނީ ތިނަކަށް މަތިކޮށްފައެވެ.
