ރާއްޖެއަށް 6 ކިލޯގެ ޕާޓީ ޑްރަގްސް އެތެރެކުރި ކަމުގެ ތހުމަތުގައި މީހަކު ހައްޔަރުކޮށްފިއެވެ.
މަސްތުވާތަކެތި އެތެރެކުރި މައްސަލާގައި ހައްޔަރުކުރީ ނެދަލެންޑްސްގެ މަޒޭސާ އެނޯކް ޑައިސޮނަމާ ކިޔާ 30 އަހަރުގެ ފިރިހެނެކެވެ. އޭނާގެ ލަގެޖެ ތެރޭގައި ހުރި ޒިޕް ލޮކް ބޭގުތަކުން މަސްތުވާތަކެތި ފެނިފައިވާއިރު، މި މީހާގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ 15 ދުވަހަށް ބަންދުކުރުމަށް އަމުރުކޮށްފައެވެ.
މި މީހާ ބަންދުކުރުމަށް ނެރުނު އަމުރުގައިވަނީ ކްރިސްޓަލްތަކެއްގެ ގޮތަށް ހުއްޓައި ފެނުނު އެއްޗިއްސާ މެދު ޝައްކުކުރެވިގެން ޓެސްޓްކުރިއިރު، ޑްރަގްގެ ބާވަތެއް ކަމުގައިވާ އެމްއެމްސީ-2 އަށް ޕޮޒިޓިވްވެފައިވާކަމަށެވެ. އެހެންކަމުން އޭނާ ދޫވެފައި ހުރެއްޖެ ނަމަ މުޖުތަމައަށް ނުރައްކާވުމުގެ ފުރުސަތު ބޮޑުކަމަށްވެސް ކޯޓު އަމުރުގައި ވަނީ ބުނެފައެވެ.
މި މައްސަލައިގެ ދިފާއުގައި އޭނާ ބުނީ ރާއްޖެ އައީ ޗުއްޓީ ހޭދަކުރަން ކަމަށެވެ. އެ ލަގެޖަކީ އޭނާގެ އެއްޗަކަށް ވިޔަސް މަސްތުވާތަކެތި އެތެރެ ނުކުރާ ކަމަށާއި އެކަން ކުރީ ދަބަސް ޕެކްކުރި މީހުން ކަމަށެވެ. އަދި އެކަން ހިނގީ އޭނާ އަށް އެނގިގެން ނޫން ކަމަށެވެ.
ފަހަކަށް އައިސް ރާއްޖޭގައި ޕާޓީ ޑްރަގްސް ބޭނުންކުރާ އަދަދު އިތުރުވަމުން އަންނައިރު، މަސްތުވާތަކެތީގެ މިފަދަ ބާވަތްތައް ބޭނުންކުރުމުގެ ސަބަބުން ފުރާނައަށް ނުރައްކާވުމުގެ ހާދިސާތައްވެސް ހިނގާފައިވެއެވެ.
