މާލޭ ސްކޫލަކަށް ވަދެ، ދަރިވަރުން ކުރިމަތީގައި ޓީޗަރުންނަށް ބިރުދެއްކި ކަމުގެ ތުހުމަތުގައި ހައްޔަރުކުރި މީހާގެ ބަންދަށް 30 ދުވަސް ޖަހައިފިއެވެ.
މި މައްސަލައިގައި ހައްޔަރު ކޮށްފައި ވަނީ ސްކޫލުގެ ދަރިވަރެއްގެ ބެލެނެވެރިއެކެވެ. މި މަހުގެ 5 ވަނަ ދުވަހު ހެނދުނުގެ ވަގުތެއްގައި ހިނގި މި ހާދިސާ އާއި ގުޅިގެން 41 އަހަރުގެ އެ މީހާ ހައްޔަރު ކޮށްފައި ވަނީ މި މަހުގެ 6 ވަނަ ދުވަހުއެވެ.
އޭނާގެ ބަންދާ މެދު ގޮތެއް ނިންމުމަށް ކޯޓަށް ހާޒިރު ކުރުމުން 30 ދުވަހަށް ބަންދުކުރުމަށް ވަނި އަމުރު ނެރެފައެވެ. އަދި އޭނާގެ ބަންދު އަމުރުގައި ބުނެފައިވަނީ ހައްޔަރުކޮށްފައި ވަނީ އެ ސްކޫލްގެ ކްލަސްރޫމް ތަކަށް ވަދެ ހަމަނުޖެހުން ހިންގި ކަމުގެ ތުހުމަތުގައި ކަމަށެވެ. އޭނާ އެކަން ކުރީ ކޮން ކަމަކާ ގުޅިގެން ކަމެއް ސާފެއް ނޫވެއެވެ. ނަމަވެސް ފުލުހުން ބުނެފައިވަނީ އޭނީ ކުދިން ކުރިމަތީގައި ޓީޗަރުންނަށް ބިރުދައްކާ، ސްކޫލްގެ މުވައްޒަފުންނާ ޒުވާބުކޮށް، ބިރުދައްކާފައިވާކަމަށެވެ. އެހެންނަމަވެސް އެއްވެސް މީހެއްގެ ގައިގައި އަތްލާފައެއް ނުވާކަމަށް ވަނީ ބުނެފައެވެ.
މީގެ އިތުރުން އޭނާއަކީ ބިރުދެއްކުމުގެ މައްސަލަތަކެއްގައި ކުށުގެ ރިކޯޑް އޮންނަ މީހެއްކަމަށް ކޯޓު އަމުރުގައިވަނީ ބުނެފައެވެ. އަދި މި އަމަލު ހިންގާފައި ވަނީ ސްކޫލެއްގެ ތެރޭގައި ކުޑަކުދިންގެ ހިތްތަކުގައި ބިރުވެރިކަން އުފެދޭ ގޮތަށް އެކަމަށް އެއްވެސް ފަރުވާލެއް ނުބަހައްޓާކަން ވެސް ބަންދު އަމުރުގައި ފާހަގަކޮށްފައިވެއެވެ.
