ބޭންކުތަކާއި އިންޝުއަރެންސް ކުންފުނިތައް އަދި މާލީ ކުންފުނިތަކުގެ ބޯޑުގައި ސިޔާސި މީހުން ހިމެނޭ ގޮތަށް ކޯޕަރޭޓު ގަވަނެންސް ގަވައިދަށް އިސްލާހު ގެނެސްފިއެވެ.
މަރުކަޒީ ބޭންކު، އެމްއެމްއޭ އިން މި ގަވައިދަށް އިސްލާހު ގެނެސް ގެޒެޓްކުރާ ތާރީހުން ފެށިގެން އަމަލު ކުރާ ގޮތަށް ނިންމާފައިވާއިރު، މިއަދު މި ގަވައިދު ވަނީ ގެޒެޓުކޮށްފައެވެ.
އެގޮތުން ކެބިނެޓު މިނިސްޓަރުންނާ، މިނިވަން މުއައްސަސާތަކުގެ ވެރިން އަދި ސިޔާސީ ޕާޓީތަކުގެ އިސް މަގާމުތަކުގައި ތިއްބަވާ ބޭފުޅުން ފިޔަވައި ސިޔާސީ މަގާމުތަކުގައި ތިއްބަވާ އެހެން ބޭފުޅުންނަށް ބޭންކުތަކާ، އިންޝުއަރެންސް ކުންފުނިތައް އަދި މާލީ ހިދުމަތް ދޭ ކުންފުނިތަކުގެ ބޯޑަށް އައްޔަންކުރެވޭނެއެވެ.
މޯލްޑިވްސް މަނިޓަރީ އޮތޯރިޓީގެ ގަވާއިދު ކުރިން އޮތް ގޮތުން ރައީސުލްޖުމްހޫރިއްޔާ އައްޔަންކުރާ އެއްވަސް މީހަކަށް ބޭންކުތަކާއި އިންޝުއަރެންސް ކުންފުނިތަކާއި ފައިނޭންސިން ކުންފުނިތަކުގެ ބޯޑުގައި ނުތިބެވެއެވެ. އަދި ސިޔާސީ ޕާޓީތަކުގެ އިސް މަގާމުތަކުގައި ތިއްބަވާ ބޭފުޅުންނަށާއި، ގާނޫނުތަކުން ބާރު ލިބިގެންް އުފައްދާފަައިވާ މުއައްސަސާތަކުގެ ވެރިންނަށް ނުތިބެވޭނެއެވެ.
އެމްއެމްއޭއިން ބޭންކުތަކުގެ ކޯޕަރޭޓް ގަވަނަންސް ރެގިއުލޭޓް ކުރާ ގަވާއިދު އިސްލާހުކޮށްފައި މި ވަނީ އެ އިދާރާގެ ގަވަރުނަރުގެ މަގާމަށް އަހުމަދު މުނައްވަރު އައްޔަންކޮށް ގެންނަމުންދާ ބޮޑެތި ބަދަލުތަކުގެ ތެރެއިންނެވެ.
