ބޭންކް އޮފް މޯލްޑިވްސްގެ އިންޓަނެޓް ބޭންކިން ހިދުމަތަށް ދިމާވި ޓެކްނިކަލް މައްސަލަ ރަނގަޅުކޮށް މިހާރު ހިދުމަތް ލިބޭނެ ކަމަށް އެ ބޭންކުން ބުނެފިއެވެ.
މިއަދު މި ހިދުމަތް މެދުކެނޑިފައި ވަނީ ހެނދުނު 7:30 ހާއިރުން ފެށިގެންނެވެ. މި ހިދުމަތް މެދުކެންޑުނު އިރު ބައެއް އޭޓިއެމްތަކުން ވެސް ހިދުމަތް ނުލިބޭ ކަމަށް ބުނެ ގިނަ ބަޔަކު ވަނީ ޝަކުވާ ކޮށްފައެވެ.
މި ަކމަށް ގުޅިގެން ބިއެމްއެލް އިން ބުނީ، ޓެކްނިކަލް މައްސަލައަކާ ގުޅިގެން ޕީއޯއެސް، އޭޓީއެމް، އިންޓަނެޓް އަދި މޮބައިލް ބޭންކިންގެ ހިދުމަތަށް ހުރަސްތަކެއް ކުރިމަތިވެފައިވާ ކަމަށެވެ. ބީއެމްއެލް ކްރެޑިޓް އަދި ޕްރީޕެއިޑް ކާޑު ބޭނުންކުރާ ކަސްޓަމަރުންގެ އިތުރުން އެހެން ބޭންކުތަކުން ދޫކުރާ ކާޑު ބޭނުންކުރާ ކަސްޓަމަރުންނަށް ވެސް ޕީއޯއެސް ނެޓްވޯކް ބޭނުން ކުރެވޭނެ ކަމަށް އެ ބޭންކުން ބުނެއެވެ. އަދި މިކަމުގައި ކަސްޓަމަރުންނަށް ދިމާވި ދަތިތަކަށް މައާފަށް އެދޭ ކަމަށާއި ވީހާވެސް އަވަހަކަށް މިކަން ހައްލުކުރުމަށް މަސައްކަތް ކުރަމުންދާ ކަމަށް ބީއެމްއެލް އިން ބުނެފައި ވެއެވެ.
އޭގެ ފަހުން ދާދި ދެންމެއަކު ބީއެމްއެލުން ބުނީ، އެ ބޭންކުގެ އިންޓަނެޓާއި މޮބައިލް ބޭންކިންގެ ހިދުމަތް މިހާރު ލިބޭނެ ކަމަށެވެ. މިދިމާވި މައްސަލައާ އެކު ކަސްޓަމަރުންނަށް ކުރާ ނޭދެވޭ އަސަރު ގަބޫލު ކުރާ ކަމަށާއި، އެކަމަށް ޓަކައި ވަރަށް އިހްލާސްތެރިކަމާއެކު މައާފަށް އެދޭ ކަމަށް ބީއެމްއެލް އިން ބުނެއެވެ.
މިއަދު ގާތްގަނޑަަކަށް 9 ގަޑިއިރަށް ބިއެމްއެލް އިންޓަނެޓް ބޭންކިންގެ ހިދުމަތް މެދުކެނޑިފައިވާ އިރު، ދާދި ފަހުން ވެސް ވަނީ ގިނަ ވަގުތުތަކަކަށް އިންޓަނެޓް ހިދުމަތް މެދުކެނޑިފައެވެ. އެއީ މިދިޔަ މަހުގެ މުސާރަ ޖަމާކުރި އިރު ލިލީ ބީޗްގެ ބައެއް މުވައްޒަފުންގެ އެކައުންޓަށް 77 ބިލިއަން ޑޮލަރަށްވުރެ ގިނައިން ޖަމާވި މައްސަލައަށް ފަހުއެވެ. މި މައްސަލައާ ގުޅިގެން ބީއެމްއެލް އިން ބުނެފައި ވަނީ، ހިއުމަން އެރޯއެއްގެ ސަބަބުން އެހެންވީ ނަމަވެސް އެ އެކައުންޓްތައް ދެނެގަނެ މިހާރު އެ ފައިސާ އަނބުރާ ހޯދާފައިވާ ކަމަށެވެ. އަދި މިކަމުގެ ސަބަބުން އެއްވެސް ކަހަލަ މާލީ ގެއްލުމެއް ލިބިފައި ނުވާ ކަމަށާއި މިއީ ބަލްކް ޕޭމެންޓް ޕްރޮސެސްއަށް ގެނައި ބަދަލަކާއި ގުޅިގެން ދިމާވި ކަމެއް ކަމަށެވެ.
ބީއެމްއެލްގެ ސިސްޓަމްތަކަކީ ރައްކާތެރި ސިސްޓަމްތަކެއް ކަމުގެ ޔަގީންކަން ބީއެމްއެލްއިން ވަނީ ދީފައެވެ.
ނުލިބޭ