ރާއްޖޭގައި ހެލިކޮޕްޓަރުގެ ހިދުމަތް ދޭނެ ބަޔަކު ހޯދުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އިން އިއުލާން ކޮށްފިއެވެ.
އެ މިނިސްޓްރީން ކޮށްފައިވާ އިއުލާނެއްގައި ބުނެފައިވަނީ ސަރުކާރުން މިހާރު ފަށާފައިވާ އެމަޖެންސީ މެޑިކަލް ހިދުމަތްތަކުގެ ތެރެއިން ބަލިމީހުން އެއްތަނުން އަނެއްތަނަށް އުފުލުމަށާ، ޓޫރިސްޓް ރިސޯޓްތަކަށް ފަތުރުވެރިން އުފުލުމުގެ މަސައްކަތް ކުރުމަށް ހެލިކޮޕްޓަރު އޮޕަރޭޓް ކޮށްދޭނެ ފަރާތެއް ހޯދަން ބޭނުންވާކަމަށެވެ.
މި ހިދުމަތް ދިނުމަށް 10 އަހަރުގެ މުއްދަތަށް ބަޔަކު ހޯދުމަށް އިއުލާންކޮށްފައިވާއިރު މިކަމަށް ޝައުގުވެރިވާ ފަރާތްތަކުން މިމަހުގެ 19 ގެ ކުރިން އެކަމަށް އެދި ހުށައެޅުމަށް ޓްރާންސްޕޯޓް މިނިސްޓްރީންވަނީ އެދިފައެވެ. އިތުރަށް އެ މިނިސްޓްރީން ބުނީ ހެލިކޮޕްޓަރުގެ ހިދުމަތްދޭން ހުއްދަދޭނީ ރާއްޖޭގެ ތިމާވެށްޓާ، ގުދުރަތީ ވެށްޓަށް ގެއްލުން ނުލިބޭނެފަދަ ގޮތަކަށް ހިދުމަތްދޭނެ ބަޔަކަށް ކަމަށެވެ.
މީގެ ކުރިން ޓްރާންސްޕޯޓް މިނިސްޓްރީން ބުނެފައިވަނީ ރާއްޖޭގައި ފަށަން ނިންމާފައިވާ ހެލިކޮޕްޓަރުގެ ހިދުމަތުގައި ބޭނުންކުރާނީ ރައްކާތެރިކަމުގެ މިންގަނޑު އެންމެ މަތީ ހެލިކޮޕްޓަރުތައްކަމަށެވެ.
ސަރުކާރުން، ހެލިކޮޕްޓަރުގެ ހިދުމަތް ފެށުމަށް ނިންމާ، ހެލިކޮޕްޓަރު އުދުއްސުމުގެ ހިދުމަތް ތައާރަފު ކުރުމާއި ގުޅޭގޮތުން ވަޒީރުންގެ މަޖިލީހަށް ހުށަހެޅުނު ކަރުދާހާ ގުޅޭގޮތުން މަޝްވަރާކޮށް އެކަމަށް ހުޅުވާލުމަށް ނިންމާފައިވަނީ ޖެނުއަރީ 28، 2024ގައެވެ.
