ބޭންކް އޮފް މޯލްޑިވްސް (ބީއެމްއެލް) އިން މުސާރައިގެ ގޮތުގައި އާއި ބޮޑެތި އަދަދުތަކުން ޓްރާންސްފާ ކުރުމަށް އިންޓަނެޓް ބޭންކިން އަދި ފަވަރަ ބޭނުންކުރުން ވަގުތީ ގޮތުން ހުއްޓާލައިފި އެވެ.
ބީއެމްއެލް އިން ބުނީ ބޮޑެތި އަދަދުތަކުން ޖަމާކުރުމަށް ދެން ރިކުއެސްޓް ކުރަން ޖެހޭނީ ކުރިން ވެސް އެކަން ކުރަމުން އައި ގޮތަށް، އީމެއިލް މެދުވެރިކޮށް ކަމަށެވެ. އެގޮތުން މުސާރަ ފަދަ ބޮޑެތި އަދަދުތަކުން ޖަމާކުރުމަށް ޕްރޮސެސް ކުރާނީ މެއިލް މެދުވެރިކޮށް ކަމަށާއި މި [email protected] އަށް މެއިލް ރިކުއެސްޓް ފޮނުވުމަށް ބީއެމްއެލް އިން ބުނެއެވެ.
ބީއެމްއެލް އިން މި ބަދަލު ގެނައީ މިދިޔަ މަހުގެ މުސާރަ ޖަމާކުރި އިރު ލިލީ ބީޗްގެ ބައެއް މުވައްޒަފުންގެ އެކައުންޓަށް 77 ބިލިއަން ޑޮލަރަށްވުރެ ގިނައިން ޖަމާވި މައްސަލައަށް ފަހުއެވެ. މި މައްސަލައާ ގުޅިގެން ބީއެމްއެލް އިން ބުނެފައި ވަނީ، ހިއުމަން އެރޯއެއްގެ ސަބަބުން އެހެންވީ ނަމަވެސް އެ އެކައުންޓްތައް ދެނެގަނެ މިހާރު އެ ފައިސާ އަނބުރާ ހޯދާފައިވާ ކަމަށެވެ. އަދި މިކަމުގެ ސަބަބުން އެއްވެސް ކަހަލަ މާލީ ގެއްލުމެއް ލިބިފައި ނުވާ ކަމަށާއި މިއީ ބަލްކް ޕޭމެންޓް ޕްރޮސެސްއަށް ގެނައި ބަދަލަކާއި ގުޅިގެން ދިމާވި ކަމެއް ކަމަށެވެ.
ބީއެމްއެލްގެ ސިސްޓަމްތަކަކީ ރައްކާތެރި ސިސްޓަމްތަކެއް ކަމުގެ ޔަގީންކަން ބީއެމްއެލްއިން ވަނީ ދީފައެވެ.
