މިދިޔަ މަހާ އަޅާބަލާއިރު މި މަހު 94 އިންސައްތަ ކަރަންޓު ބިލްތައް ވަނީ ކުޑަވެފަކަމަށް ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ ވިދާޅުވެއްޖެއެވެ.
މިއަދު ސްޓެލްކޯއިން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ފަހުމީ ވިދާޅުވީ ޖުމްލަ ކޮށް އެހެން މަސްތަކާ އަޅާބަލާއިރު މި މަހު ކަރަންޓު ބިލާ ބެހޭ ގޮތުން ލިބުނު ޝަކުވާގެ އަދަދުވެސް މަދު ކަމަށާއި، މިދިޔަ މަހާ އަޅާބަލާއިރު މި މަހު 94 އިންސައްތަ ކަރަންޓު ބިލްތައް ވަނީ ކުޑަވެފަކަމަށެވެ.
ނަމަވެސް ފަހުމީ ވިދާޅުވީ މާލެއަށް ބަލާއިރު 6 އިންސައްތަގެ ކަރަންޓު ބިލުތައް އިންތިހާއަށް ބޮޑުވެފައިވާކަމަށާއި، އެކަމުގެ ތަފްސީލެއް އެ ކުންފުނިން ބަލާ މައުލޫމާތު ހިއްސާކުރާނެ ކަމަށެވެ. މާލޭގެ އިތުރުން ހުޅުމާލޭގެ ވެސް 15 އިންސައްތަ ބިލުތައް ބޮޑުކަމަށާއި މި ކަން ބެލުމަށް ސްޓެލްކޯގެ ޓީމެއް އެ އެޕާޓްމެންޓުތަކަށް ފޮނުވާނެ ކަމަށް ފަހުމީ ވަނީ ވިދާޅުވެފައެވެ.
ފަހުމީ ވިދާޅުވީ މާލެ އަދި ހުޅުމާލޭގެ ބިލްތައް އާދަޔާ ހިލާފަށް ބޮޑުވެފައިވާ އެޕާޓްމެންޓުތަކަށް ސްޓެލްކޯގެ ޓީމެއް ގޮސް އެނާޖީ އޮޑިޓެއް ހަދާނެ ކަމަށާއި އެގޮތުން އެ އެޕާޓްމެންޓުތަކުގައި ބޭނުން ކުރަނީ ކޮން ކަހަލަ އާލާތްތަކެއްތޯ އަދި އެ އެޕާޓްމެންޓު ތަކުގެ ވެންޓިލޭޝަންތައް ޗެކު ކުރާނެ ކަމަށެވެ.
މީގެކުރިން ފަހުމީ ވަނީ ސްޓެލްކޯއިން ދޭ ހިދުމަތް ހީނަރުވެއްޖެނަމަ ދިވެހި ދައުލަތް ހީނަރުވެ، ދިވެހި ދައުލަތުގެ އިގުތިސޯދީ މިނިވަންކަން ހީނަރުވާނެ ކަމަށާއި ކަރަންޓާއި ނުލައި ގައުމުގެ އިގުތިސޯދީ މިނިވަންކަން ޔަގީން ނުކުރެވޭނެ ކަމަށް ވިދާޅުވެފައެވެ.
ފަހުމީ ވިދާޅުވީ މިހާތަނަށް ހިދުމަތް ކުރަމުން ދަނީ، އަދި މުސްތަގުބަލުގައި ހިދުމަތް ކުރާނީ ދިވެހި ދައުލަތަށް ކަމަށާއި، ރައްޔިތުންނަށް ހިދުމަތް ދިނުމުގައި ސްޓެލްކޯއިން ދުވަހަކުވެސް އޮޅުވާނުލާނެ ކަމަށެވެ.
