ޔުޓިލިޓީ ރެގިއުލޭޓަރީ އޮތޯރިޓީ (ޔޫއާރުއޭ)ގެ މިންގަނޑަށް މަގުބައްތިތައް އިސްލާހު ކުރުމަށް އިތުރު 21 ދުވަހުގެ މުއްދަތެއް ފެނަކަ ކޯޕަރޭޝަނުން ދީފިއެވެ.
ރަށްރަށުގެ ކަރަންޓުގެ ހިދުމަތްތައް ހަރުދަނާ ކުރުމާއި ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ޔޫއާރުއޭ އިން ކަނޑައަޅާފައިވާ ހާއްސަ މިންގަނޑަށް މަގު ބައްތިތައް އިސްލާހު ކުރުމަށް ފެނަކައިން ވަނީ ރަށު ކައުންސިލަށް އަންގާފައެވެ.
މަގު ބައްތިތައް އިސްލާހު ކުރުމަށް ކައުންސިލަށް އަންގާފައިވާކަން ފާހަގަކޮށް ފެނަކައިން ބުނީ މީގެކުރިން ޔޫއާރުއޭގެ މިންގަނޑަށް ފެތޭނެ ފަދައިން މަގުބައްތިތައް އިސްލާހު ކުރުމަށް ވަކި މުއްދަތެއް ކަނޑައަޅައި އެ މުއްދަތުގެ ތެރޭގައި އެކަން އިސްލާހު ނުކޮށްފިނަމަ، އެ ރަށެއްގެ މަގުބައްތިތަކުން ކަރަންޓު ކަނޑާލުމަށް ނިންމާފައިވާކަން ކައުންސިލްތަކަށް އަންގާފައިވާނެ ކަމަށެވެ.
އެންމެ ފުރަތަމަ މި މަސައްކަތް ކުރުމަށް މުއްދަތު ދީފައި ވަނީ މިދިޔަ ޖޫން މަހުގެ 9 ވަނަ ދުވަހުއެވެ. ނަމަވެސް ބައެއް ކައުންސިލްތަކުގެ އެދުމުގެ މަތިން، މިދިޔަ މަހުގެ 3 ވަނަ ދުވަހު ފެނަކައިންވަނީ 1 މަސް ދުވަހުގެ އިތުރު މުއްދަތެއް ދީފައެވެ. އަދި އެ މުއްދަތު މިއަދަށް ހަމަ ވާއިރު، އެ ކުންފުނިން ވަނީ އަނެއްކާވެސް އިތުރު މުއްދަތެއް ދިނުމަށް ނިންމާފައެވެ.
އެގޮތުން މިއަދުން ފެށިގެން 21 ދުވަހަށް މަގުބައްތިތައް އިސްލާހުކުރުމަށް މުއްދަތު އިތުރުކުރުމަށް ނިންމާފައިވާ ކަމަށް ފެނަކައިން ބުނެއެވެ. އަދި މި މުއްދަތު ހަމަވާނީ މި މަހުގެ 21 ވަނަ ދުވަހާ ކަމަށް ވާއިރު، ކައުންސިލްތަކަށް ފެނަކައާއި ގުޅިގެން އެ މަސައްކަތް ކުރުމުގެ ފުރުސަތު މި މަހުގެ 7 ވަނަ ދުވަހާއި ހަމައަށް ހުޅުވާލެވިފައިވާ ކަމަށް ވެސް އެ ކުންފުނިން ބުނެއެވެ.
ފެނަކައިން އިތުރަށް ބުނީ މި މުއްދަތުގެ ތެރޭގައި މަގުބައްތިތައް ޔޫއާރުއޭއިން ކަނޑައަޅާފައިވާ މިންގަނޑާ އެއްގޮތަށް އިސްލާހުކޮށްފައިނުވާ ނަމަ، އެ ރަށެއްގެ މަގުބައްތިތަކުން ކަރަންޓު ކަނޑާލާނެ ކަމަށެވެ.
މަގުބައްތިއަކުން ކަރަންޓު ޖެހި ރ. އުނގޫފާރުގެ ކުއްޖަކު ނިޔާވުމާ ގުޅިގެން ފެނަކައިން ވަނީ ރަށްރަށުގައި ހުރި މަގުބައްތިތައް ޔޫއާރުއޭގެ މިންގަނޑުތަކަށް އިސްލާހު ކުރުމުގެ މަސައްކަތް ފަށާފައެވެ. އެ ހާދިސާ ހިނގާފައި ވަނީ މަގު ބައްތިތަކުގައި ހުންނަން ޖެހޭ ސަލާމަތީ އިކުއިޕްމަންޓު ތަކުގެ ތެރޭގައި ހިމެނޭ އާތް ލީކް ސާކެޓް ބްރޭކާ (އީއެލްސީބީ) އަދި މިނިއޭޗާ ސާކެޓް ބްރޭކާ (އެމްސީބީ) ހަރުކުރެވިފައިނުވާ މަގު ބައްތިތަކަށް ފެނަކައިން ކަރަންޓު ދީފައި ވާތީ ކަމަށް ޔޫއާރުއޭއިން ވަނީ ބުނެފައެވެ.
