ބައެއް މީހުންގެ އެކައުންޓުތަކަށް، ގިނަ އަދަދެއްގެ ޑޮލަރު އަދި ރުފިޔާ ޖަމާކުރެވިފައި ވަނީ އޮޅިގެން ކަމަށް ބޭންކް އޮފް މޯލްޑިވްސް (ބީއެމްއެލް)އިން ބުނެފިއެވެ.
ބައެއް މީހުންގެ އެކައުންޓަށް ގިނަ އަދަދެއްގެ ޑޮލަރު އަދި ފައިސާ ޖަމާކުރެވުނީ ޕޭމަންޓް ޕްރޮސެސް ކުރުމުގައި ދިމާވި ހިއުމަން އެރޯއެއްގެ ސަބަބުން ކަމަށް ބީއެމްއެލްއިން ބުނެއެވެ.
ބީއެމްއެލްއިން ބުނީ ހިއުމަން އެރޯއެއްގެ ސަބަބުން އެހެންވީ ނަމަވެސް އެ އެކައުންޓްތައް ދެނެގަނެ މިހާރު އެ ފައިސާ އަނބުރާ ހޯދާފައިވާ ކަމަށެވެ. އަދި މިކަމުގެ ސަބަބުން އެއްވެސް ކަހަލަ މާލީ ގެއްލުމެއް ލިބިފައި ނުވާ ކަމަށާއި މިއީ ބަލްކް ޕޭމެންޓް ޕްރޮސެސްއަށް ގެނައި ބަދަލަކާއި ގުޅިގެން ދިމާވި ކަމެއް ކަމަށް ބީއެމްއެލްއިން ވަނީ ބުނެފައެވެ.
ބީއެމްއެލްގެ ސިސްޓަމްތަކަކީ ރައްކާތެރި ސިސްޓަމްތަކެއް ކަމުގެ ޔަގީންކަން ބީއެމްއެލްއިން ވަނީ ދީފައެވެ.
ޕޭމަންޓް ޕްރޮސެސް ކުރުމުގައި ދިމާވި މައްސަލައާ ގުޅިގެން ލިލީ ބީޗް ރިސޯޓުގެ ބައެއް މުވައްޒަފުންގެ އެކައުންޓަށް ވަނީ 77 މިލިއަން ޑޮލަރު ޖަމާވެފައެވެ.
ބީއެމްއެލްއަށް ދިމާވި މި މައްސަލައާއެކު ބީއެމްއެލް މޯބައިލް އެޕްގެ ހިދުމަތް ވަނީ 3 ގަޑިއިރެއް ހާއިރަށް މެދުކެނޑިފައެވެ. ނަމަވެސް މައްސަލަ ހައްލުކޮށް ބީއެމްއެލްއިން ވަނީ މިހާރު ހިދުމަތް ދޭން ފަށާފައެވެ،
