މިއަދުން ފެށިގެން ފެއާ، ނައިޓްމާކެޓް ނުވަތަ މަގުމަތީބާޒާރު ހިންގުމުގެ ހުއްދަ ދޫކުރާނީ ގިނަވަގެން 10 ދުވަހުގެ މުއްދަތަކަށް ކަމަށް އިކޮނޮމިކް މިނިސްޓްރީން ބުނެފިއެވެ.
ފެއާ، ނައިޓްމާކެޓް ނުވަތަ މަގުމަތީބާޒާރު ހިންގުމުގެ ހުއްދަ ދޫކުރުމުގައި އަމަލުކުރާނެ އުސޫލަށް އިސްލާހް ގެނެސް ގެޒެޓްކޮށްފައިވާއިރު، މި ގޮތަށް ވިޔަފާރި ކުރެވޭނީ ރާއްޖޭގައި ރަޖިސްޓަރީ ކޮށްފައިވާ ވިޔަފާރިއެއް ނުވަތަ ޖަމިއްޔާއަކަށެވެ. އަދި އިމްޕޯޓު މުދަލުގެ ވިޔަފާރި ކުރެވޭ ގޮތަށް ނައިޓް މާކެޓް ބާއްވަންޖެހޭނީ ވަކި މުނާސަބަތަކާ ގުޅިގެންކަމަށް ގަވައިދުގައި ބަޔާންކޮށްފައިވެއެވެ.
މީގެ އިތުރުން ފެއާ، ނައިޓްމާކެޓް ނުވަތަ މަގުމަތީބާޒާރުގައި ކެއުމުގެ ބާވަތްތައް ވިއްކާ ނަމަ، ރަޖިސްޓަރީ ކުރާ ކުންފުނި ނުވަތަ ޖަމިއްޔާއިން އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން ނަގަން ޖެހޭ ހުއްދަ ނަގާފައިވޭތޯ ކަށަވަރު ކުރަން ޖެހެއެވެ. އަދި ވިއްކާ ހުރިހާ މުދަލެއްގައި ވެސް އާންމުންނަށް ފެންނާނެހެން އަގު ޖަހައިފައި ހުންނަން ޖެހޭނެއެވެ.
މާލޭގައި މީގެ ކުރިންވެސް މަގުމަތީ ބާޒާރުތައް ދޭތެރެެ ދޭތެރެއިން ބާއްވަމުން އަންނައިރު، މިދިޔަ އަހަރުން ފެށިގެން ހުޅުމާލޭގެ ފޭސް 1، އަދި ފޭސް 2ގައިވެސް ފެއާ، ނައިޓްމާކެޓް ނުވަތަ މަގުމަތީބާޒާރު ބޭއްވުމުގެ ހުއްދަ މިނިސްޓްރީން ވަނީ ދޫކުރަން ފަށާފައެވެ.
