ބީއެމްއެލްގެ ދެވަނަ ކުއާޓާގައި ސާފު ފައިދާގެ ގޮތުގައި 448 މިލިއަން ރުފިޔާ ލިބިއްޖެ އެވެ.
މި ކުއާޓާގައި ބޭންކުގެ ހިންގުމުގެ ފައިދާގެ ގޮތުގައި 698 މިލިއަން ރުފިޔާ ލިބިފައިވާއިރު މިއީ މިދިޔަ އަހަރުގެ ދެވަނަ ކުއާޓާއާއި އަޅާބަލާއިރު 3 ޕަސެންޓު އިތުރު އަދަދެކެވެ.
އެ ބޭންކުން ނެރުނު ބަޔާނެއްގައި ބުނީ މިއަހަރުގެ ފުރަތަމަ ހަ މަސްދުވަހު ބޭންކުން ވަނީ 2.8 ބިލިއަން ރުފިޔާގެ އައު ލޯނު އަމިއްލަ ފަރުދުންނާއި ވިޔަފާރިތަކަށް ދޫކޮށްފައެވެ. އަދި ހަަމައެހެންމެ ވިޔަފާރީގެ މައިގަނޑު ހުރިހާ ދާއިރާ އަކުންވެސް ކުރިއެރުން ލިބިފައިވާއިރު ބޭންކުގެ ރައުސްމާލް ވަނީ ގާނޫނުން ލާޒިމްކުރާ މިންވަރަށްވުރެ މަތީގައި ހިފަހެއްޓިފައިވާ ކަމަށް ބުނެއެވެ.
މި ކުއާޓާ ނިމުނުއިރު، ޖުމްލަ އެސެޓް ވަނީ 44.9 ބިލިއަން ރުފިޔާ އަށް އަރާ ކަމަށް ބޭންކުން މައުލޫމާތު ދިނެވެ. އަދި ކަސްޓަމަރުން ޑިޕޮސިޓްކޮށްފައިވާ އަދަދަށް ބަލާއިރު 29.5 ބިލިއަން ރުފިޔާ ވަނީ ލިބިފައެވެ. އިންފްލޭޝަންއާ ގުޅިގެން އަންނަ ޕްރެޝަރުތަކާއެކުވެސް ހިންގުމުގެ ހަރަދުތައް ހިފެހެއްޓުނުކަން ފާހަގަކޮށް ބީއެމްއެލް އިން ބުނީ، ޕްރޮވިޝަން ކަވާ ހުރީ ހަރުދަނާކަމާއެކު 100 ޕަސެންޓުގައި ކަމަށެވެ.
މީގެ އިތުރުން މި ކުއާޓާގައި ބޭންކުން ވަނީ ރާއްޖޭގެ ޝަރުއީ ހަމަތަކަށްފެތޭ ފުރަތަމަ ކްރެޑިޓް ކާޑު ތައާރަފްކޮށްފައެވެ. އަދި ގެދޮރު އިމާރާތްކުރުމާއި މަރާމާތު ކުރުމަށް ކަސްޓަމަރުންގެ އޮތް ޑިމާންޑަށް ބަލައި ހޯމް ބިލްޑް އަދި ހޯމް އިކުއިޓީ ލޯނު ވެސް ބޭންކުން ވަނީ ތައާރަފްކޮށްފައެވެ. އަދި ހަމައެހެންމެ ދެމެހެއްޓެނިވި ޕްރޮޖެކްޓްތަކަށް އެހީތެރިކަން ފޯރުކޮށްދިނުމަށާއި ޖަމިއްޔާތައް ބާރުވެރިކޮށް، މުޖުތަމައަށް އެހީވުމަށް ބޭންކުގެ ސީއެސްއާރް ހަރަކާތްތަކުގެ ތެރެއިން ނިމިދިޔަ ކުއާޓާގައި 'ބޭންކް ފަންޑް" އަށް އެދި ހުށަހަޅުމުގެ ފުރުސަތު ހުޅުވާލާފައިވާ ކަމަށް މައުލޫމާތު ދިނެވެ.
ބީއެމްއެލް އިން ބުނި ގޮތުގައި އެ ބޭންކުގެ އަމާޒަކީ މުޅި ރާއްޖެ ހިމެނޭ ބޭންކިންގް ވިއުގަޔަކާއެކު 38 ބްރާންޗާއި ސާވިސް ސެންޓާއި، 86 ސެލްފްސާވިސް ބޭންކިންގް ސެންޓަރާއި، 144 އޭޓީއެމް، ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިން ހިދުމަތާއެކު ބޭންކް އަމިއްލަ ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުމެވެ.
ބީއެމްއެލްގެ ފުރަތަމަ ކުއާޓާގައި ސާފު ފައިދާގެ ގޮތުގައި 493 މިލިއަން ވަނީ ލިބިފައެވެ.
