އަންހެނަކަމަށް އަނިޔާކުރި މީހަކު ހައްޔަރުކޮށް، އޭނާގެ ބަންދަށް 30 ދުވަސް ޖަހައިފިއެވެ.
މި މައްސަލައިގައި ހައްޔަރުކޮށްފައި ވަނީ ގދ. ތިނަދޫއަށް އުފަން އުމުރުން 29 އަހަރުގެ ފިރިހަނެކެވެ.
މި މައްސަލައާއި ގުޅިގެން ހައްޔަރުކުރި މީހާ ކޯޓުގައި ބުނެފައިވަނީ މި ހާދިސާ އަކީ ރުޅި އައިސްގެން ހިނގި ޒުވާބެއް ކަމަށާއި އަންހެން މީހާއަށް އެއްވެސް އަނިޔާއެއް ކޮށްފައި ނުވާނެކަމަށެވެ. އަދި އޭނާއަކީ ޑައިވީނަށް ދާ މީހެއް ކަމަށްވުމުން ދަބަހުގައި އޮތް ވަޅިއަކީ ޑައިވީނަށް ދާއިރު ބޭނުން ކުރާ އެއްޗެއް ކަމުގައި ވަނީ ބުނެފައެވެ.
ކްރިމިނަލް ކޯޓުން ކޮށްފައިވާ އަމުރުގައި ބުނެފައިވަނީ މި މައްސަލައިގައި ހައްޔަރުކުރި މީހާ އަކީ ކުށުގެ 26 ރެކޯޑް އޮންނަ މީހެއް ކަމަށެވެ. މީގެ އިތުރުން ކޯޓުގައި އަމުރުގައިވަނީ އޭނާ އާއި އަނިޔާ ލިބުނު ފަރާތާއި ލޯބި ގުޅުމެއް އޮތްކަމަށް އޭނާގެ ދައްކާފައިވާ ވާހަކަތަކުން އެނގޭކަން ފާހަގަކޮށްފައެވެ. އަދި މި މީހާ ދޫކޮށްލައިފިނަމަ އަންހެންމީހާއަށް އަނިޔާކޮށް ކުށް ތަކުރާރު ކުރުމުގެ ފުރުސަތު އޮތްކަމަށް ފެންނަ ކަމަށް ފާހަގަކޮށް މި މައްސަލައާއި ގުޅިގެން 30 ދުވަހުގެ މުއްދަތައް ބަންދުކުރުމަށް އަމުރުކޮށްފައެވެ.
