އޮލިމްޕަސް ކޮމްޕްލެކްސްގައި ކުއްޔަށް ދީގެން ހިންގަމުންދާ ކެފޭގެ ސީލިން ވެއްޓުނީ ކަތުރުފަނީގެ ސަބަބުން ކަމަށް ނެޝަނަލް ސެންޓާ ފޯ ދި އާޓްސް (އެންސީއޭ) އިން ބުނެފިއެވެ.
އޮލިމްޕަސް ރެސްޓޯރެންޓްގެ ސީލިން ވެއްޓިފައި ވަނީ ރޭ 23:00 ކަންހާއިރުއެވެ. މި ހާދިސާ ހިނގިއިރު ރެސްޓޯރަންޓު ތެރޭގައި މީހުންވެސް ތިބިކަމަށް މައުލޫމާތު ލިބޭއިރު އެންސީއޭ އާއި ހަވާލާދީ ޔޫތް މިނިސްޓްރީން ބުނީ މިހާދިސާގައި އެއްވެސް ފަރާތަކަށް އަނިޔާވެފައި ނުވާ ކަމަށެވެ. އަދި މިފަދަކަމެއް ތަކުރާރުވިޔަ ނުދިނުމަށްޓަކައި އަޅަންޖެހޭ ހުރިހާ ފިޔަވަޅުތަކެއް އެޅުމުގެ މަސައްކަތް ކުރަމުންދާ ކަމަށެވެ.
ހަމައެހެންމެ އިމާރާތް ބާވެ، ކަތުރުފަނީގެ ސަބަބުން ހަލާކުވެފައި ހުރި ތަންތަން ރަނގަޅުކުރުމުގެ މަސައްކަތް ކުރަމުންދާ ކަމަށް އެންސީއޭއިން ވަނީ ބުނެފައެވެ.
ދިގު މުއްދަތަކަށް އޮލިމްޕަސް ބަންދުކޮށްފައި އޮތުމަށްފަހު، ބޭރު ގައުމެއްގެ އެހީއާއި ދައުލަތުގެ ބަޖެޓުން ބޮޑު ހޭދައެއްކޮށްގެން އޮލިމްޕަސް އަލުން ހުޅުވީ މިދިޔަ އަހަރުގެ ފެބްރުއަރީ 4 ވަނަ ދުވަހުއެވެ.
ދެ ފިޔަވަށްސަކަށް ބަހާލައިގެން ކުރިއަށް ގެންދިޔަ މި ޕްރޮޖެކްޓްގެ ފުރަތަމަ ފިޔަވަހީގެ ދަށުން އޮލިމްޕަހުގެ ލޮބީ ސަރަޙައްދާއި، ޓިކެޓް ކައުންޓަރާއި، ރެސްޓޯރަންޓު ސަރަޙައްދު ވަނީ މަރާމާތުކޮށްފައެވެ. އަދި ދެވަނަ ފިޔަވަހީގެ ދަށުން އޮލިމްޕަހުގައި ހުރި ޓެކްނިކަލް މައްސަލަތައް ހައްލުކޮށް، ޒަމާނީ ވަސީލަތްތަކަށް ބަދަލުކޮށްފައި ވެއެވެ.
އެ ތާރީހުން ފެށިގެން 18 މަސް ދުވަހުގެ މުއްދަތަކީ ރަނގަޅު ފެންވަރެއްގެ މަސައްކަތެއް ކުރެވިފައި ހުރިނަމަ ބޮޑު މަރާމާރަތަކަށް އަލުން ދާން ނުޖެހި، ސަލާމަތް ކުރެވޭނެވަރުގެ ކުރު މުއްދަތެއް ނަމަވެސް މިވީ މުއްދަތުގައިވެސް މަސައްކަތުގެ ފެންވަރު ދަށްވުމުގެ ސަބަބުން ކަތުރުފަންޏަށް ބޭސް ޖަހާފައިވާ ކަމަށް އެންސީއޭއިން ވަނީ މައުލޫމާތު ދީފައެވެ.
