މާލޭގައިި ހިނގި ގުރޫޕް މާރާމާރީ އަކާއި ގުޅިގެން 5 މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރު ކުރީ 19 އަހަރުގެ މީހަކާ، 20 އަަހަރުގެ މީހަކާ، 23 އަަހަރުގެ މީހަކާ އަދި 24 އަހަރުގެ ދެ މީހުންނެވެ.
މި މީހުންގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރު ކުރުމުން، އެ ކޯޓުން ވަނީ އޭގެ ތެރެއިން ދެ މީހަކު ތަހުގީގު ނިމެންދެން ބަންދުކުރުމަށް އަމުރުކޮށްފައެވެ. އަދި ދެން ތިބި 3 މީހުން ފަސް ދުވަހަށް ބަންދުގައި ބޭތިއްބުމަށް އަމުރުކޮށްފައެވެ.
މި މީހުންނާ ދެކޮޅަށް، ފުލުހުން ކޯޓަށް ހުށަހަޅާފައިވަނީ، ފުލުހުންގެ ބަޔާނާ، އިންޓަލިޖެންސް ރިޕޯޓު އަދި ހާދިސާ ރިޕޯޓުގައިވާ ތަފުސީލުތަކުގެ އިތުރުން ސީސީޓީވީ ފުޓޭޖާ، އެ ފުޓޭޖުގެ ސްނެޕްޝޮޓްތަކާ އަދި އަނިޔާ ލިބުނު ފަރާތުގެ ފޮޓޯއެވެ.
ކްރިމިނަލް ކޯޓުން ނެރުނު އަމުރުގައިވާ ގޮތުން އެމީހުންގެ މައްޗަށް ކުރަނީ، ޖަމާއަތް ހަދައިގެން ތޫނު ހަތިޔާރާ ނުރައްކާތެރި ހަތިޔާރު ބޭނުންކޮށްގެން މާރާމާރީ ހިންގި ކަމުގެ ތުހުމަތެވެ. އަދި މި އެންމެން ބަންދުން ދޫކޮށްލައިފިނަމަ, މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ކޯޓު އަމުރުގައި ބުނެފައިވެއެވެ.
