ގަވާއިދާ ހިލާފަށް ވިޔަފާރި ކުރަމުންދިޔަ އިތުރު 6 ބިދޭސީން ހައްޔަރުކޮށްފިއެވެ.
ރާއްޖޭގައި ގަވާއިދާ ހިލާފަށް އުޅޭ ބިދޭސީން ހޯދަން ފުލުހުންނާއި އިމިގްރޭޝަނުން ގުޅިގެން ކުރަމުންދާ މަސައްކަތުގެ ތެރެއިން ރޭ ވެސް ވަނީ ހާއްސަ އޮޕަރޭޝަނެއް ހިންގާފައެވެ. އެގޮތުން އަމީނީ މަގުގައި ހުންނަ ލޯކަލް މާރުކޭޓު ފުލުހުން ވަނީ ބަލާ ފާސްކޮށްފައެވެ.
"ދަ ޕްރެސް"އަށް މައުލޫމާތު ދެމުން ފުލުހުންގެ މީޑިއާ އޮފިޝަލަކު ވިދާޅުވީ ރޭ ހިންގި އޮޕަރޭޝަނުގައި ގަވާއިދާ ހިލާފަށް މަސައްކަތް ކުރަމުންދިޔަ 6 ބިދޭސީއަކު ފުލުހުންގެ ބެލުމުގެ ދަށަށް ގެންދެވުނު ކަމަށެވެ. އަދި މިހާރު އެ މީހުން އިމިގްރޭޝަންއާ ހަވާލުކޮށްފައިވާ ކަމަށް ފުލުހުން ވަނީ ބުނެފައެވެ.
ހުޅުމާލެ ފޭސް 1 ގައި ގަވާއިދާ ހިލާފަށް ޓޭކްއަވޭ ކޮފީ ޝޮޕްގެ ހިދުމަތް ދެމުން ގެންދިޔަ 8 ބިދޭސީއަކު ވެސް ފުލުހުން ވަނީ މި މަހުގެ ތެރޭގައި އަތުލައިގެންފައެވެ. އަދި އެމީހުން އިމިގްރޭޝަންއާ ހަވާލުކޮށްފައި ވާއިރު، އެ މީހުން އަތުލައިގެންފައި ވަނީ ގަވާއިދާ ހިލާފަށް އުޅޭ ބިދޭސީން ޓޭކްއަވޭ ކޮފީ ޝޮޕްތައް ހިންގާ ކަމަށް ތުހުމަތު ކުރެވިގެން ހިންގި އޮޕަރޭޝަނެއްގައެވެ.
މީގެއިތުރުން މިދިޔަ މަހު، މަޖީދީމަގުގައި ހުންނަ ހާފް ޕްރައިސް ކިޔާ ތަރުކާރީ ފިހާރައެއް ފުލުހުން ބަލާ ފާސްކުރުމުގެ ތެރޭގައި ގަވާއިދާ ހިލާފަށް ވިޔަފާރި ކުރާ 50 ބިދޭސީން ވަނީ އިމިގްރޭޝަނާ ހަވާލުކޮށްފައެވެ.
އިކޮނޮމިކް މިނިސްޓްރީން ވަނީ ބިދޭސީން ރާއްޖޭގައި ވިޔަފާރި ކުރުން މަނާ ދާއިރާތައް ހާމަކޮށްފައެވެ. އެގޮތުން ބިދޭސީން ރާއްޖޭގައި ވިޔަފާރި ކުރުން މަނާ 25 ދާއިރާއެއް ބަޔާންކޮށްފައިވެވެ.
