މަސްތުވާތަކެތި ގެންގުޅުނުކަމުގެ ތުހުމަތުގައި ހައްޔަރުކުރި އަންހެނަކު ކަސްޓޯޑިއަލް ޖަލެއްގައި 10 ދުވަހުގެ މުއްދަތައް ބަންދުކުރުމަށް ކްރިމިނަލް ކޯޓުން އަމުރުކޮށްފިއެވެ.
ފުލުހުން ބުނީ މަސްތުވާތަކެތި ގެންގުޅެ އެތަކެތި ބޭނުންކޮށް އޭގެ ވިޔަފާރި ކުރި މައްސަލައިގައި ހައްޔަރުކޮށްފައިވަނީ ހދ. ކުޅުދުއްފުށީ، އާނިރު، ޝަޒުނާ މުހައްމަދު (28އ)އެވެ.
ކްރިމިނަލް ކޯޓުން އޭނާ ބަންދުކުރުމަށް ނެރުނު އަމުރުގައި ބުނެފައިވަނީ ޝަޒުނާގެ ކަނައަތު މުށުތެރެއިން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވާ ކަމަށެވެ. އެހެންކަމުން އޭނާ ބަންދުން ދޫކޮށްލައިފިނަމަ އެ ކުށް ތަކުރާރު ވާނެ ކަމަށާއި އަދި މުޖުތަމައުއަށް ނުރައްކާވާނެކަމަށް ކްރިމިނަލް ކޯޓުން ވަނީ ބުނެފައެވެ.
ކްރިމިނަލް ކޯޓުން ނެރުނު އަމުރުގައި އިތުރަށް ބުނެފައިވަނީ އޭނާގެ މައްޗަށް ތުހުމަތުކޮށްފައިވާ ކުށް ކުރިކަމަށް ސާބިތުވާ މިންވަރަށް ހެއްކާ ގަރީނާ ހުށަހަޅާފައިވާކަމަށާ އޭނާ ހައްޔަރުކޮށްފައިވަނީ ޖިނާއީ އިޖުރާއަތްތަކާ އެއްގޮތަށް ކަމަށެވެ. އަދި އޭނާ އަކީ މީގެ ކުރިންވެސް ބަންދާއި ހައްޔަރުގެ ރެކޯޑު އޮތް މީހެއް ކަމަށް ކޯޓުން ވަނީ ބުނެފައެވެ. މި ތުހުމަތުތަކާއި ގުޅިގެން ޝަޒުނާ ވަނީ، އޭނާ މި މައްސަލައިގައި ކުރިއަށް ދާން ބޭނުންވަނީ ވަކީލަކާ އެކު ކަމަށް ބުނެފައެވެ.
ކްރިމިނަލް ކޯޓުން ވަނީ ކަސްޓޯޑިއަލް ޖަލެއްގައި އޭނާ 10 ދުވަހަށް ބަންދުކުރުމަށް އަމުރުކޮށްފައެވެ.
