މީނާލް ފެނުނީ ދެ ފަހަރެއްގެ މަތިން ބެލި ފަޅު ގެއެއްގެ ތެރެއިން، މިހާތަނަށް ޝައްކު ކުރެވޭ ކަމެއް ނެތް: ކައުންސިލް

ގދ. ފިޔޯރީން ގެއްލުނު 9 އަހަރުގެ މަރިޔަމް މީނާލް ފެނުނީ، ދެ ފަހަރެއްގެ މަތިން ބެލި ފަޅު ގެއެއްގެ ތެރެއިން ކަމަށް އެ ރަށު ކައުންސިލުން ބުނެފިއެވެ.

ފިޔޯރީ، ފިނިވިލާގެ، މަރިޔަމް މީނާލް މުހައްމަދު ގެއްލުނީ އިއްޔެ ހަވީރު 17:30 އެހާއިރުއެވެ. "ދަ ޕްރެސް" އަށް މައުލޫމާތު ދެއްވަމުން ފިޔޯރީ ކައުންސިލް މެމްބަރު މުހައްމަދު ޝަހުމަތު ވިދާޅުވީ މީނާލް އަކީ މީގެ ކުރިންވެސް ހިތް ހަމަ ނުޖެހިއްޖެނަމަ ގެއިން ބޭރަށް ދާ ކުއްޖެއް ކަމަށެވެ. އަދި ހަވީރު ކުޅެ ހަދަން ވެސް ބޭރަށް އެކަނި ދާ ކަމަށް އޭނާ ވިދާޅުވިއެވެ.

ބޭރަށް ނިކުތް ނަމަވެސް އިރުއޮއްސި 6 ޖަހާއިރު އެނބުރި ގެއަށް އަންނަ މީނާލް އިއްޔެ ނާދެއެވެ. މީނާލް ގެ ބައްޕަ އަކީ އެ ރަށު ކައުންސިލްގައި މަސައްކަތް ކުރާ މުވައްޒަފެއްކަން ފާހަގަކޮށް ޝަހުމަތް ވިދާޅުވީ، ގެއަށް އެނބުރި އައުން ލަސްވެ މީނާލްގެ އާއިލާއިން އޭނާ ހޯދުމުގެ މަސައްކަތް ފެށި ކަމަށެވެ. އަދި ނުފެނި ގިނައިރުވުމުން މައްސަލަ ފުލުހުންގެ ސަމާލުކަމަށް ގެނެސް ރަށު ރައްޔިތުންނާއި ކައުންސިލުންވެސް މީނާލް ހޯދުމުގެ މަސައްކަތް ފެށި ކަމަށް ވެއެވެ. ރަށުގެ ރައްޔިތުންގެ ފަރާތުން ލިބުނު އެހީތެރިކަމަށް ޝުކުރު އަދާ ކުރަމުން ޝަހުމަތު ވިދާޅުވީ މީނާލް ފެނުނީ ރޭ 10:30 އާއި 11:00 އާއި ދެމެދުގެ ވަގުތެއްގައި ކަމަށެވެ.

އެކި އެކި ގުރޫޕަށް ބަހާލާ ރަށުގެ ރައްޔިތުނާއެކު ކުޑަ ކުޑަ މީނާލް ހޯދުމުގެ މަސައްކަތް ކުރަމުން ދަނިކޮށް ފެނުނީ އެ ގެއާ މާ ދުރުނޫން ފަޅު ގެއެއްގެ ތެރެއިން ކަމަށް ޝަހުމަތު ކިޔާދިނެވެ. މީނާލް އެތަނުގައި އޮތް ކަން އިނގުނީ އެ ގޭ ކައިރި ތިބި ބަޔަކަށް އަޑުތަކެއް އިވޭތީ ގޮސް އެތަން އަނެއްކާވެސް ބެލުމުން ކަމަށާއި އެއީ މީގެ ކުރިން މީހުން ދިރިއުޅުނު ގެއެއް ކަމަށްވެސް އޭނާ ވިދާޅުވިއެވެ. ނަމަވެސް މިހާރު ފަޅަށް ހުންނަ އެ ގެއަކީ 6 ފޫޓުގެ ފާރެއް ހުންނަ ގެއެއްކަން ފާހަގަކޮށް ޝަހުމަތު ވިދާޅުވީ މީހަކަށް އެ ގޭ ފާރު މަތިން އެރުމަކީ އުނދަގޫ ކަމެކެވެ. މައި ދޮރާށި ހުރީ ތަޅުނުލާ ކަމަށާއި މީނާލް އެގެއަށް ވަނީ އެކަނި ކަމަށްވުންވެސް އެކަށީގެންވާ ކަމަށް އޭނާ ވިދާޅުވިއެވެ.

މީނާލް ފެނުނީ އެ ގޯތީގެ ފާރާއި ގޭގެ ބިތާއި ދެމެދުގައި އޮންނަ ހަނި ޖާގައެއްގެ ތެރޭގައި އޮއްވައެވެ. އަދި އެވަގުތު މުޅި އެއްކޮށް ހޭ ނާރާ ނަމަވެސް ފެން އަޅާ ހެދުމުން ހޭ އަރާ، ހޮސްޕިޓަލަށް ގެންގޮސް ފަރުވާ ދިނުމުން މީނާލް ހަމައަކަށް އެޅުނު ކަމަށް ޝަހުމަތު ވިދާޅުވިއެވެ. އަދި ހޮސްޕިޓަލުން ރޭ ދަންވަރު 02:00 ޖަހާކަށްހާއިރު ދޫކޮށްލުމުން ފޯނާއި ފައިވާން އެ ގޭތެރޭ އޮންނާނެ ކަމަށް ބުނެ އެ ތަކެތި ބަލާވެސް ދިޔަކަމަށް ޝަހުމަތު ވިދާޅުވިއެވެ.

ބޭރުފުށުން އެއްވެސް ހާނިއްކައެއް/އަނިޔާއެއް ލިބިފައި ނެތްކަން ފާހަގަކޮށް ޝަހުމަތު ވިދާޅުވީ ޕްރޮސީޖާގެ ދަށުން ހަދަން ޖެހޭ އިތުރު ޓެސްޓުތައް ހެދުމަށް މީނާލް މިހާރުވީ އެ އަތޮޅު ތިނަދޫ ހޮސްޕިޓަަލަށް ގެންގޮސްފައި ކަމަށެވެ. ޝައްކު ކުރެވޭ އެއްވެސް މީހަކުވެސް ނެތް ކަމަށާއި އެފަދަ ވާހަކައެއް މީނާލް ވެސް އަދި މިހާތަަނަށް ކިޔާދީފައި ނުވާ ކަމަށް ޝަހުމަތު ވިދާޅުވިއެވެ.