މަޖީދިއްޔާ ސްކޫލުގައި ކިޔަވަމުން ދިޔަ ދަރިވަރަކު ޓީބީ އަށް ޕޮޒިޓިވް ވެއްޖެއެވެ.
'ދަ ޕްރެސް' އަށް މައުލޫމާތު ދެމުން އެޑިއުކޭޝަން މިނިސްޓްރީގެ މީޑިއާ އޮފިޝަލް ވިދާޅުވީ މަޖީދިއްޔާ ސްކޫލުގައި ކިޔަވަމުން ދާ ދަރިވަރަކު ޓީބީ އަށް ޕޮޒިޓިވް ވުމާ ގުޅިގެން އެޗްޕީއޭ ގެ ޕްރޮޓެކޯލް އާ އެއްގޮތަށް، އެޗްޕީއޭގެ ލަފާގެ މަތިން މި ކަން ބަލަމުން އަންނަކަމަށެވެ. އެހެންނަމަވެސް މިކަމާ ގުޅޭ އިތުރު ތަފްސީލެއް މިނިސްޓްރީން ހާމަކޮށްފައެއް ނުވެއެވެ. މި ކޭސްއާ ގުޅިގެން އެޗްޕީއޭއިން މިހާތަނަށް އެއްވެސް މައުލޫމާތެއް އަދި ހިއްސާކޮށްފައި ނުވެއެވެ.
ދެކުނު އިތުމަތީ އޭޝިއާ ސަރަހައްދުން ޓީބީ ނައްތާލުމާ ޓީބީއާ ގުޅޭ މަސައްކަތްތައް ހަރުދަނާކުރުމަށް ކުރީ ސަރުކާރުން "ސްޓޭޓްމަންޓް އޮފް ކޮމިޓްމަންޓް" އެއްގައި ސޮއިކޮށްފައި ވާއިރު، އޭރު ސަރުކާރުން ބުނެފައި އޮތީ އަމާޒަކީ 2025 ވަނަ އަހަރާ ހަމައަށް ރާއްޖެއިން ޓީބީ ނައްތާލުން ކަމަށެވެ.
ޓީބީ އަކީ "މައިކްރޯބެކްޓީރިއަމް ޓިއުބޮކިއުލޮސިސް" ނަމަކަށް ކިޔާ ބެކްޓީރިއާ އަކުން ޖެހޭ އިންފެކްޝަން ބައްޔެކެވެ. ޓީބީގެ ސަބަބުން އެންމެ ބޮޑު އަސަރެއް ކުރަނީ ފުއްޕާމެޔަށް ކަމުގައިވީ ނަމަވެސް ހަށިގަނޑުގެ އެހެނިހެން ހިސާބުތަކަށް ވެސް އޭގެ އަސަރުކުރެ އެވެ. މައިގަނޑުގޮތެއްގައި މިބައްޔަކީ ވައިގެ ޒަރީއާއިން ފެތުރޭ ބައްޔެކެވެ. ޓީބީ ޖެހިފައިވާ މީހުންގެ ފަރާތުން ބަލި ފެތުރެން މެދުވެރިވަނީ ކެއްސާ، ކިނބިހިއަޅައި، ކުޅުޖެހުން ނުވަތަ ހުނުން ފަދަ ކަމެއް ކުރުމުގެ ތެރޭގައި ވައިގެ ތެރެއަށް ބޭރުވާ ޖަރާސީމްތައް ނޭވާލުމުގެ ތެރެއިން ހަށިގަނޑަށް ވާސިލު ވުމުންނެވެ.
