ރައީސް ގެންދަވަނީ ރައްޔިތުންނަށް ހައްގު ޔަގީންކޮށްދެއްވަމުން ކަމަށް މާފަންނު ދެކުނު ދާއިރާގެ މެންބަރު އަބްދުﷲ ރިފާއު (ބޮޗޭ) ވިދާޅުވެއްޖެއެވެ.
ކުރީ ސަރުކާރުން 'ބިންވެރިޔާ' ސްކީމުގެ ދަށުން ދޫކޮށްފައިވާ ގޯތިތަކާއި ގޯތީގެ ރަޖިސްޓްރީ ތިން މަސް ދުވަހުގެ ތެރޭގައި ހަވާލުކުރަން ޖެހޭ ގޮތަށް ބިމާ ބެހޭ ގާނޫނަށް ގެނައި އިސްލާހު ތަސްދީގު ނުކޮށް ރައީސް ޑރ. މުހައްމަދު މުއިއްޒު ބިލު އަނބުރާ ފޮނުވާލި ސިޓީ މިއަދު މަޖިލީހުގައި ވަނީ އިއްވާފައެވެ.
އެ ބަހުސްގައި ބޮޗޭ ވިދާޅުވީ 2019 ވަނަ އަހަރު މަޖިލީހުގެ ސުޕަ މެޖޯރިޓީ ރައްޔިތުން ދިނީ ވަރަށް އުންމީދާއެކު ކަމަށާއި އެހެންނަމަވެސް ރައްޔިތުންނަށް ފެނިގެން ދިޔައީ ރައްޔިތުން އެދިން ފުރުސަތު ނާޖާއިޒު ގޮތުގައި ހިފަމުން ދިޔަތަން ކަމަށެވެ. އަދި 2023 ވަނަ އަހަރު ރައްޔިތުން ރައީސް މުއިއްޒާ ވެރިކަން ހަވާލުކުރެއްވިއިރު އެ މަނިކުފާނަށް ރައްޔިތުންގެ އިތުބާރު އޮވެގެން ކަމަށާިއ އެހެންނަމަވެސް އެ މަނިކުފާނަށް އެ ފުރުސަތު ދިނުމާއެކުގައި އެ މަޖިލީހުންގެ ދުއްތުރާ ކުރިމަތިވި ކަމަށް ބޮޗޭ ވިދާޅުވިއެވެ.
ބޮޗޭ ވިދާޅުވީ ރާއްޖޭގެ އަދި ވަކިން ހާއްސަކޮށް މާލޭގެ ރައްޔިތުންގެ އެއް ކަންބޮޑުވުން ނުވަތަ އެއް ތަކުލީފު ކަމަށްވާ ބޯހިޔާވަހިކަމުގެ ދަތިކަން ކަމަށެވެ. އަދި މާލޭގެ ރައްޔިތުންނަށް ގޯތި ނުލިބޭތާ އެތައް އަހަރު ތަކެއްވެފައިވާ ކަމަށާއި އެންމެންވެސް އެ ގޯތި ބޭނުންވާ ކަމަށް ބޮޗޭ ވިދާޅުވިއެވެ.
ބޮޗޭ ވިދާޅުވީ އޭނާ ވެސް ގޯތި ބޭނުންވާ ކަމަށާއި މުޅި އުމުރުގައި އަދި ދުވަހަކުވެސް ގޯއްޗެއް ލިބިވަޑައިގެންފައި ނުވާ ކަމަށެވެ. އަދި ގޯތި ބޭނުންވަނީ ވެސް އެއް ދުވަހުން ކަމަށްވެސް ބޮޗޭ ވިދާޅުވިއެވެ.
ބޮޗޭ ވިދާޅުވީ އެހެންނަމަވެސް އެ ކޮންމެ ކަމަކީވެސް އުސޫލުތަކަކާއި ގާނޫނުތަކަކާއި ގަވާއިދުތަކަކާ އަދި ހަމަތަކެއްގެ މަތިން ކުރެވެން ޖެހޭ ކަމެއް ކަމަށާއި ޖެއްސުން ކުރާ އުސޫލުން އެތަނުގައި ގާނޫނުތައް ފާސްކުރުމަކީ ރައްޔިތުންނަށް އެންމެ ރަނގަޅު ފައިދާ ބޮޑު ގޮތެއް ކަމަށް ނުދެކޭ ކަމަށެވެ. އަދި އަމީން އާންމު އިއްވެވި ސިޓީއަށް ބަލާއިރު މުޅިން ވެސް ފެންނަނީ ޖެއްސުން ކުރާ އުސޫލުން ކަންކޮށްފައި އޮތް ތަން ކަމަށް ބޮޗޭ ވިދާޅުވިއެވެ.
ބޮޗޭ ވިދާޅުވީ ރައީސް ވަރަށް ސާފުކޮށް އެތައް ޕްލެޓްފޯމެއްގައި ރައްޔިތުންނަށް ޔަގީންކަން ދެއްވަމުން ގެންދަވާ ކަމަށާއި އުނި އިތުރު އެންމެ ސެންޓިމީޓަރެއްވެސް ނުކުރާނެ ކަމުގެ ޔަގީންކަން ރައީސް ދެއްވާ ކަމަށެވެ. އަދި އިންތިހާބު ގާތްވުމުން އެމްޑީޕީއިން ކުއްލި ގޮތަކަށް ތެޅިފޮޅިގަނެފައި ހާވާ ހަޑި ސާފުކުރުމުގެ ޒިންމާ ރައީސް ގެ އިސްތަށިފުޅުގައި އެޅިވަޑައިގެންފައިވާ ކަމަށް ބޮޗޭ ވިދާޅުވިއެވެ.
ބޮޗޭ ވިދާޅުވީ އެތައް ބޭކާރު ހަރަދުތަކެއް މިއަދު އެޗްޑީސީއިން ކުރަމުން އެ ގެންދަނީ ރައްޔިތުންނަށް އެ ހައްގު އެ ހައްގު ހޯދައި ދިނުމަށްޓަކައި ރައީސްގެ އިހުލާސްތެރިކަން އޮތުމުން ކަމަށާއި އެ ބިލް ރައީސް ފޮނުވި ގޮތަށް ބޭރުކުރުމަށް ތާއީދުކުރައްވާ ކަމަށެވެެ.
