އިގްތިސޯދު ކޮމިޓިގެ މުގައްރިރު ކަމަށް ފުވައްމުލަކު މެދު ދާއިރާގެ މެންބަރު އަލީ ފަޒާދު ހަމަޖައްސައިފިއެވެ.
އެ މަގާމަށް ފަޒާދު އިންތިހާބުކޮށްފައިވަނީ މިއަދު ބޭއްވި އެ ކޮމިޓީގެ ފުރަތަމަ ބައްދަލުވުމުގައެވެ.
އިގްތިސޯދީ ކޮމިޓީގެ މުގައްރިރުގެ މަގާމަށް ފަޒާދުގެ ނަން ހުށަހަޅުއްވާފައި ވަނީ ތިނަދޫ އުތުރު ދާއިރާ މެންބަރު ސައުދުﷲ ހިލްމީއެވެ. އަދި އެ ހުށަހެޅުމަށް ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ވަނީ ތާއީދު ކުރައްވާފައެވެ.
އެ ކޮމިޓީގެ ނައިބު މުގައްރިރުގެ މަގާމަށް ކެންދޫ ދާއިރާގެ މެންބަރު މައުރޫފް ޒާކިރު ވަނީ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިރުގެ ނަން ހުށަހަޅުއްވާފައެވެ. އެ ނަން ހުށަހަޅުއްވާ މައުރޫފް ވިދާޅުވީ އެ ހުށަހެޅުން ހުށަހެޅުއްވީ މައިނޯރިޓީކަން އެނގިވަޑައިގެން ކަމަށާއި އެހެންނަމަވެސް ނާޒިލް މިދިޔަ ދައުރުގައިވެސް އެ ކޮމިޓީގެ ނައިބު މުގައްރިރުކަން ކުރައްވާފައިވާ ކަމަށެވެ. އަދި އެ ކޮމިޓީއަށް ނާޒިލް ގިނަ މަސައްކަތްތަކެއް ކޮށްދެއްވާ ތަޖުރިބާ ލިބިވަޑައިގެންފައިވާ ކަން މައުރޫފް ފާހަގަކުރެއްވިއެވެ.
މައުރޫފްގެ އެ ހުށަހެޅުއްވުމަށް އަމީން ފައިސަލް ތާއީދު ކުރައްވާފައިވާއިރު އެ ހުށަހެޅުމަށް ފެންނަ ކަމަށް ތިން މެންބަރަކު އަދި ނުފެންނަ ކަމަށް ހަތް މެންބަރަކު ވަނީ ވޯޓު ދެއްވާފައެވެ. އަދި އެ ކޮމިޓީގެ ނައިބު މުގައްރިރުގެ މަގާމަށް ފޭދޫ އުތުރު ދާއިރާގެ މެންބަރު އިސްމާއިލް ނިޒާރު ސައުދުﷲ ހިލްމީ ނަން ހުށަހެޅުއްވިއިރު އެ ހުށަހެޅުމަށް ޒަމީރު ވަނީ ތާއީދު ކުރައްވާފައެވެ.
އެ މަގާމަށް ސައުދުﷲ އިންތިހާބުވެވަޑައިގެންފައިވަނީ 10 މެންބަރުންގެ ވޯޓާއެކުއެވެ.
އިގްތިސޯދީ ކޮމިޓީ:
- މައްޗަންގޯޅި މެދު ދާއިރާގެ މެންބަރު އަހްމަދު ޒަމީރު
- ހޯރަފުށި ދާއިރާގެ މެންބަރު އަލީ މޫސާ
- ކަނޑިތީމު ދާއިރާގެ މެންބަރު އަމީން ފައިސަލް
- ކެނދިކުޅުދޫ ދާއިރާގެ މެންބަރު މުހައްމަދު އަފޫ ހާމިދު
- ކެންދޫ ދާއިރާގެ މެންބަރު މައުރޫފް ޒާކިރު
- ކާށިދޫ ދާއިރާގެ މެންބަރު މުންތަސިމް އިބްރާހިމް
- މީދޫ ދާއިރާގެ މެންބަރު އަހުމަދު ސިޔާމް މުހައްމަދު
- ތިނަދޫ އުތުރު ދާއިރާގެ މެންބަރު ސައުދުﷲ ހިލްމީ
- ފުވައްމުލަކު މެދު ދާއިރާގެ މެންބަރު އަލީ ފަޒާދު
- ފޭދޫ އުތުރު ދާއިރާގެ މެންބަރު އިސްމާއިލް ނިޒާރު
- ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް
ނިމިދިޔަ ރައްޔިތުންގެ މަޖިލީހުގައި އިގްތިސޯދީ ކޮމިޓީގައި ހިމެނިވަޑައިގަންނަވަނީ 14 މެންބަރުން ނަމަވެސް 20 ވަނަ ރައްޔިތުންގެ މަޖިލީހުގެ ފުރަތަމަ ޖަލްސާގައި އެ އަދަދު 11 އަށް ބަދަލުކޮށް ވަނީ ފާސްކޮށްފައެވެ.
