20 ވަނަ ރައްޔިތުންގެ މަޖިލީހުގެ ދާއިމީ ކޮމިޓީތަކަށް މެންބަރުން ކަނޑައަޅައިފިއެވެ.
ކޮމިޓީތައް އެކުލަވާލާފައިވަނީ މަޖިލީހުގައި ހިމެނިވަޑައިގަންނަވާ ހުރިހާ ޕާޓީއެއްގެ މެންބަރުން ހިމެނޭ ގޮތަށެވެ.
މި ދައުރުގެ ފުރަތަމަ ޖަލްސާގައި 241 ކޮމިޓީގެ މެންބަރުގެ އަދަދު 13 އަށް، އެހެން ދާއިމީ ކޮމިޓީތަކުގެ މެންބަރުގެ އަދަދު 11 އަށް ބަދަލުކޮށް ފާސްކޮށްފައިވާއިރު އިއްޔެގެ ނިޔަލަށް މަޖިލީހުގައި ހިމެނޭ ސިޔާސީ ޕާޓީތަކުންނާއި ވަކި ޕާޓީއަކަށް ނިސްބަތް ނުވާ މެންބަރުން މަޖިލީހުގެ ދާއިމީ ކޮމިޓީތަކަށް ހަމަޖެއްސުމަށް ބޭނުންވާ މެންބަރުންގެ ނަންތައް މަޖިލީހުގެ ސެކެއްޓްރޭޓަށް ފޮނުވުމަށް ވަނީ ނިންމާފައެވެ.
މަޖިލީހުގެ ޕާލަމެންޓްރީ ގްރޫޕްތަކުން ކުރި މަޝްވަރާއަށްފަހު ޕާޓީތަކުން ހުށަހެޅި މެންބަރުން ހިމަނައިގެން ކޮމިޓީތަކުގެ އެކުލެވުން މިއަދުގެ ޖަލްސާގައި ނެގި ވޯޓުގައި ބައިވެރިވި 88 މެންބަރުންގެ އިއްތިފާގުން ވަނީ ފާސްވެފައެވެ.
19 ވަނަ ރައްޔިތުންގެ މަޖިލީހުގައި ދާއިމީ ކޮމިޓީގައި ތިބި މެންބަރުގެ އަދަދު:
- އާންމު ކޮމިޓީގައި 8 މެންބަރުން
- ގަވާއިދު ކޮމިޓީ 10 މެންބަރުން
- މާލިއްޔަތު ކޮމިޓީ 16 މެންބަރުން
- އިގްތިސޯދީ ކޮމިޓީ 14 މެންބަރުން
- އިޖްތިމާއީ ކޮމިޓީ 9 މެންބަރުން
- މިނިވަން މުވައްސަސާތަކުގެ ކޮމިޓީ 11 މެންބަރުން
- ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ 12 މެންބަރުން
- ގައުމީ ތަރައްގީއާއި ތަރިކައިގެ ކޮމިޓީ 9 މެންބަރުން
- ހާރިޖީ ގުޅުންތަކުގެ ކޮމިޓީ 12 މެންބަރުން
- ޕެޓިޝަން ކޮމިޓީ 8 މެންބަރުން
- އިމްތިޔާޒާއި ސުލޫކް ކޮމިޓީ 12 މެންބަރުން
- ލާމަރުކަޒީ ކޮމިޓީގައި 9 މެންބަރުން
- ޖުޑީޝިއަރީ ކޮމިޓީ 11 މެންބަރުން
- އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީ 10 މެންބަރުން
- ހިއުމަން ރައިޓްސް އެންޑް ޖެންޑަރ ކޮމިޓީ 10 މެންބަރުން
- ސްޓޭޓް އޯންޑް އެންޓަރޕްރައިސަސް ކޮމިޓީ 12 މެންބަރުން
އޭގެ އިތުރުން ނިމިދިޔަ ރައްޔިތުންގެ މަޖިލީހުގައި ސަލާމަތީ ހިދުމަތްތަކާބެހޭ ކޮމިޓީ ގައި ހިމެނިވަޑައިގަންނަވަނީ 18 މެންބަރުންނެވެ.
20 ވަނަ މަޖިލިސް އިންތިހާބުގައި ސަރުކާރު ތަމްސީލު ކުރާ ޕީއެންސީއިން ވަނީ 90 ދާއިރާއަކަށް ވާދަކޮށް، މަޖިލީހުގެ 66 ގޮނޑިއާއެކު މަޖިލީހުގެ ސުޕާ މެޖޯރިޓީ ހޯދާފައެވެ. އަދި އިދިކޮޅު އެމްޑީޕީއިން 89 ދާއިރާއަކަށް ވާދަކޮށްފައިވާއިރު އެ ޕާޓީއަށް ކާމިޔާބު ކުރެވިފައި ވަނީ 12 ގޮނޑިއެވެ.
މީގެއިތުރުން އެމްޑީއޭއިން 2 ގޮނޑި ކާމިޔާބުކޮށްފައިވާއިރު ޖުމްހޫރީ ޕާޓީ އަދި އެމްއެންޕީއަށް ކާމިޔާބު ކުރެވިފައި ވަނީ މަޖިލީހުގެ އެންމެ ގޮނޑިއެކެވެ. އަދި އަމިއްލަ ގޮތުން ވާދަކުރެއްވި 11 ކެންޑިޑޭޓަކު މަޖިލީހުގެ ގޮނޑި ކާމިޔާބު ކުރައްވާފައިވާއިރު އެއަށްފަހު 9 ކެންޑިޑޭޓަކު ވަނީ ޕީއެންސީއަށް ސޮއިކުރައްވާފައެވެ. ވުމާއެކު ޕީއެންސީގެ މެންބަރުގެ ޖުމްލަ އަދަދަކީ 75 އެކެވެ.
