241 ކޮމިޓީގެ މެންބަރުގެ އަދަދު 13 އަށް، އެހެން ދާއިމީ ކޮމިޓީތަކުގެ މެންބަރުގެ އަދަދު 11 އަށް ބަދަލުކޮށް ފާސްކޮށްފިއެވެ.
އެގޮތަށް ފާސްކޮށްފައިވަނީ މިއަދު ބޭއްވި 20 ވަަނަ ރައްޔިތުންގެ މަޖިލީހުގެ ފުރަތަމަ ޖަލްސާގައެވެ.
އިނގުރައިދޫ ދާއިރާގެ މެންބަރު ފަލާހު ހުށަހެޅުއްވި ހުށަހެޅުމުގައި ވަނީ ރައްޔިތުންގެ މަޖިލީހުގެ ދާއިމީ ކޮމިޓީތައް އެކުލަވާލާއިރު ސަލާމަތީ ހިދުމަތްތަކާ ބެހޭ ކޮމިޓީގެ މެންބަރުގެ އަދަދަކީ 13 ކަމަށާއި އެކޮމިޓީ ފިޔަވާ ރައްޔިތުންގެ މަޖިލީހުގެ ދާއިމީތަކުގެ ކޮމީޓީތަކުގެ އަދަދު 11 ކަމަށް ކަނޑައެޅުމަށެވެ.
އޭގެ އިތުރުން އަންނަ އާދިއްތަ ދުވަހުގެ ނިޔަލަށް މަޖިލީހުގައި ހިމެނޭ ސިޔާސީ ޕާޓީތަކުންނާއި ވަކި ޕާޓީއަކަށް ނިސްބަތް ނުވާ މެންބަރުން މަޖިލީހުގެ ދާއިމީ ކޮމިޓީތަކަށް ހަމަޖެއްސުމަށް ބޭނުންވާ މެންބަރުންގެ ނަންތައް މަޖިލީހުގެ ސެކެއްޓްރޭޓަށް ފޮނުވުމަށް ވެސް ފަލާހު ވަނީ ހުށަހަޅުއްވާފައެވެ.
އެ ހުށަހެޅުމަށް ބާރަށު ދާއިރާގެ މެންބަރު އިބްރާހިމް ސުޖާއު ވަނީ ތާއީދު ކުރައްވާފައެވެ.
އެ ހުށަހެޅުމާ ގުޅިގެން ހަނިމާދޫ ދާއިރާގެ މެންބަރު އަބްދުލް ގަފޫރު މޫސާ ވިދާޅުވީ 241 ކޮމިޓީ 13 އަށް ބަދަލުކޮށް އެހެން ކޮމިޓީ 11 އަށް ބަދަލުކުރާއިރުގައި މަޖިލީހުގެ ކޯރަމްގެ މައްސަލަ ވޯޓާސްގެ މައްސަލައެއް ނިކުމެދާނެ ކަމަށް ފެންނާތީ އިދާރީ މޭޒުން އެކަން ސާފުކުރުމުން މަސައްކަތައިގެން ކުރިއަށް ދެވޭނެ ކަމަށެވެ. އަދި މިހާރުގެ ގަވާއިދުގައި ކޯރަމްއަކީ ވަކި އަދަދެއް ކަމަށް ހިމަނާފައިވާ ކަމަށާއި އެކަން ޔަގީންކޮށް އެ ބަދަލުގެނައުމަކަށް ގަފޫރު ވަނީ ތާއީދު ކުރައްވާފައެވެ.
އެއަށްފަހު މަޖިލީހުގެ ރިޔާސަތު ބަލަހައްޓަވަމުން ގެންދެވި މަޖިލީހުގެ ނައިބު ރައީސް އަހުމަދު ނާޒިމް ވަނީ އިދާރީ މޭޒުން އެކަން ސާފުކުރައްވާފައެވެ. ނާޒިމް ވިދާޅުވީ މަޖިލީހުގެ ގަވާއިދުގައި އޮންނަ އޮތުމާއި ކޮމިޓީގެ ހިންގާ ގަވާއިދުގައި އޮންނަ އޮތުމާ އެއީ ތަފާތެއް ކަމަށާއި އަދަދަށް ބަދަލު ގެނައި ކަމަށް ވިޔަސް މަޖިލީހުގެ ގަވާއިދު އޮންނަ ގޮތަށް ކުރިއަށް ގެންދެވޭނެ ކަމަށެވެ. އަދި ކޮމިޓީއިން ކޮމިޓީގެ ހިންގާ ގަވާއިދަށް ބަދަލެއް ގެނެސްގެން ކުރިއަށް ގެންދެވޭނެ ކަމަށް ނާޒިމް ވިދާޅުވިއެވެ.
19 ވަނަ ރައްޔިތުންގެ މަޖިލީހުގައި ދާއިމީ ކޮމިޓީގައި ތިބި މެންބަރުގެ އަދަދު:
- އާންމު ކޮމިޓީގައި 8 މެންބަރުން
- ގަވާއިދު ކޮމިޓީ 10 މެންބަރުން
- މާލިއްޔަތު ކޮމިޓީ 16 މެންބަރުން
- އިގްތިސޯދީ ކޮމިޓީ 14 މެންބަރުން
- އިޖްތިމާއީ ކޮމިޓީ 9 މެންބަރުން
- މިނިވަން މުވައްސަސާތަކުގެ ކޮމިޓީ 11 މެންބަރުން
- ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީ 12 މެންބަރުން
- ގައުމީ ތަރައްގީއާއި ތަރިކައިގެ ކޮމިޓީ 9 މެންބަރުން
- ހާރިޖީ ގުޅުންތަކުގެ ކޮމިޓީ 12 މެންބަރުން
- ޕެޓިޝަން ކޮމިޓީ 8 މެންބަރުން
- އިމްތިޔާޒާއި ސުލޫކް ކޮމިޓީ 12 މެންބަރުން
- ލާމަރުކަޒީ ކޮމިޓީގައި 9 މެންބަރުން
- ޖުޑީޝިއަރީ ކޮމިޓީ 11 މެންބަރުން
- އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީ 10 މެންބަރުން
- ހިއުމަން ރައިޓްސް އެންޑް ޖެންޑަރ ކޮމިޓީ 10 މެންބަރުން
- ސްޓޭޓް އޯންޑް އެންޓަރޕްރައިސަސް ކޮމިޓީ 12 މެންބަރުން
އޭގެ އިތުރުން ނިމިދިޔަ ރައްޔިތުންގެ މަޖިލީހުގައި ސަލާމަތީ ހިދުމަތްތަކާބެހޭ ކޮމިޓީ ގައި ހިމެނިވަޑައިގަންނަވަނީ 18 މެންބަރުންނެވެ.
ފަލާހު ހުށަހެޅުއްވި އެ މައްސަލަ ވޯޓުގައި ބައިވެރިވެވަޑައިގެންނެވި 88 މެންބަރުންގެ އިއްތިފާގުން ވަނީ ފާސްވެފައެވެ.
