ކުލަ ހެދުމުގައި ތިބި ދެ ފުލުހަކަށް ބިރުދައްކައި މާރާމާރީ ހިންގިކަމުގެ ތުހުމަތުގައި ހައްޔަރުކުރި ތިން މީހުން ހަތް ދުވަހަށް ބަންދު ކޮށްފިއެވެ.
ރޭ 10 ޖަހާކަން ހާއިރު ކުލަ ހެދުމުގައި ތިބި ދެ ފުލުހަކަށް ވަޅިން ބިރުދައްކައި މާރާމާރީ ހިންގި މައްސަލައިގައި ހައްޔަރުކުރީ ތިން ދިވެހިންނެވެ. އެއީ:
- 35 އަހަރުގެ ފިރިހެނެއް
- 39 އަހަރުގެ ދެ ފިރިހެނުން
އެ މީހުންގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް މިއަދު ހާޒިރުކުރުމުން، އެ ކޯޓުން ވަނީ ހަތް ދުވަހަށް ތިން މީހުން ބަންދުކުރުމަށް އަމުރުކޮށްފައެވެ.
ހަމަ އެއާއެކު އެ ތިން މީހުން ހައްޔަރުކުރުމުގައި ފުލުހުން އަމަލުކުރި ގޮތާ މެދު ޝަކުވާތައް ލިބިފައިވާތީ ފުލުހުންގެ ޕްރޮފެޝަނަލް ސްޓޭންޑާޑްސް ކޮމާންޑުން އެކަން ބަލަމުންދާ ކަމަށް، މީޑިއާ އަށް ފޮނުވި މެސެޖެއްގައި ފުލުހުން ބުންޏެވެ.
ފުލުހުން ދަނީ އެ މައްސަލަ އިތުރަށް ތަހްގީގު ކުރަމުންނެވެ.
