ބޮޑުރަސްގެފާނު މަގުގައި ކުނި ބަހައްޓަމުން ދާ ކަމުގެ ޝަކުވާ ކައުންސިލަށް ލިބެމުންދާ ކަމަށާއި މިގޮތަށް މަގުމަތީ ކުނި ބަހައްޓާފަރާތްތަށް ޖޫރިމަނާ ކޮށް ފިޔަވަޅު އަޅާނެ ކަމަށް މާލެ ސިޓީ ކައުންސިލުން ބުނެފިއެވެ.
މާލެ މަގުތަކަށް ކުނި އަޅާ މައްސަލައަކީ ބޮޑުވެފައި އޮތް މައްސަލައެކެވެ. މިދިޔަ މާޗު މަހުގެ 14 ވަނަ ދުވަހުވެސް ވަނީ މާލޭގެ މަގެއް މައްޗަށް ކުނި އެޅި މީހަކު ފުލުހުން ހޯދައި ޖޫރިމަނާ ކޮށްފައެވެ.
މާލޭ ސިޓީ ކައުންސިލުން ބުނީ މާލޭ މަގުމަތީގައި ކުނި ބެހެއްޓި މީހަކު މާފަންނު ވިލީ ފުލުހާއި ކައުންސިލްގެ ކޮމިއުނިޓީ އެންގޭޖުމަންޓް ޔުނިޓު ގުޅިގެން ހޯދާފައިވާ ކަމަށާއި އަދި އޭނާ ޖޫރިމާނާ ވެސް ކޮށްފައިވާ ކަމަށް މާލެ ސިޓީ ކައުންސިލުން ވަނީ ބުނެފައެވެ.
އާންމު ތަންތަނުގައި ކުނި ބެހެއްޓުމާ ގުޅިގެން މާލެ ސިޓީ ކައުންސިލުން 100 އަށްވުރެ ގިނަ މީހުންނަށް ފިޔަވަޅު އަޅާފައިވާއިރު މަގުމަތީގައި ގަވައިދާ ހިލާފަށް ކުނި ބަހައްޓާ ނަމަ 500 ރުފިޔާ އިން ޖޫރިމަނާކުރާނެއެވެ. މާލެ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ ފާއިތުވި 18 ދުވަސްތެރޭ 305.65 ޓަނުގެ ކުނި މާލެ ތެރެއިން ނެގާފައިވާކަމަށެވެ.
