މި ހިނގާ 2024 ވަނަ އަހަރުގެ ފުރަތަމަ ކުއާޓާގައި އާސަންދައަށް ކުރި ހޭދަ، 838 މިލިއަން ރުފިޔާއަށް އަރާފައިވާ ކަމަށް އެ ކުންފުނީގެ ތަފާސްހިސާބުތަކުން ދައްކައިފިއެވެ.
އާސަންދަ ކުންފުނިން މިއަދު އާންމު ކުރި ތަފާސް ހިސާބުތަކުން ދައްކާ ގޮތުން މާޗް މަހުގެ 31 ވަނަ ދުވަހުގެ ނިޔަލަށް ޖުމްލަ 838 މިލިއން ރުފިޔާ ވަނީ އެ ސްކީމަށް ހަރަދުކޮށްފައެވެ. އެއީ، މިދިޔަ އަހަރުގެ އެ މުއްދަތާ އަޅައިބަލާއިރު، 4.8 ޕަސެންޓުގެ އިތުރުވުމެކެވެ.
ފާއިތުވި އަހަރުގެ ފުރަތަމަ ކުއާޓަގައި އާސަންދަ ސްކީމުގެ ދަށުން ކުރި ޖުމުލަ ހަރަދަކީ 799 މިލިއަން ރުފިޔާއެވެ. މިއަހަރުގެ ފުރަތަމަ ކުއާޓަރގައި އާސަންދަ ސްކީމުގެ ދަށުން ޚިދުމަތް ހޯދި މީހުންގެ ޢަދަދުވެސް ވަނީ ފާއިތުވީ އަހަރުގެ މި މުއްދަތާ އަޅާ ބަލާއިރު އިތުރުވެފައިވާ ކަން އާސަންދަ އިން ވަނީ ފާހަގަކޮށްފައެވެ.
ފާއިތުވީ އަހަރު ހިދުމަތް ހޯދި މީހުންގެ އަދަދު ޖުމުލަ 273،434 ގައި ހުރިއިރު، މިއަހަރު މި އަދަދުވަނީ 276،439 އަށް އިތުރުވެފައެވެ. މިއަހަރުގެ ފުރަތަމަ ކުއާޓަރގައި އާސަންދަ ސްކީމްގެ ދަށުން 1،599 ފަހަރަށް ބަލި މީހުން އިމަރޖަންސީ ހާލަތުގައި އެއް ރަށުން އަނެއް ރަށަށް ވަނީ ގެންގޮސްފައެވެ. އަދި ފަރުވާއަށް ރާއްޖެއިން ބޭރަށް 1،691 ބަލިމީހުން ވަނީ ފޮނުވާފައެވެ.
އާސަންދައަށް މިދިޔަ އަހަރުގެ ބަޖެޓުގައި ފުރަތަމަ ކަނޑައެޅީ 730.9 މިލިއަން ރުފިޔާ އެވެ. އާސަންދަ ބަޖެޓު ހުސްވުމުން ސަރުކާރުން ވަނީ ސަޕްލިމެންޓްރީ ބަޖެޓެއް ހުށަހަޅައި އާސަންދައަށް 906.7 މިލިއަން ރުފިޔާ އިތުރުކޮށްފަ އެވެ.
ސަޕްލިމަންޓްރީ ބަޖެޓާއެކު މިދިޔަ އަހަރުގެ އާސަންދަ ބަޖެޓަކީ 1.6 ބިލިއަން ރުފިޔާ އެވެ. ނަމަވެސް މިދިޔަ އަހަރު ނިމުނުއިރު އާސަންދައަށް ކުރި ހަރަދު 1.8 ބިލިއަނަށް އަރަ އެވެ. ދައުލަތުގެ ބަޖެޓުން އާސަންދައަށް ކުރާ ހޭދަ އަހަރަކަށްވުރެ އަހަރެއް ބޮޑުވަމުން އަންނައިރު މިދިޔަ ފަސް އަހަރު އެކަނިވެސް އެ އަދަދުތައް 60 އިންސައްތަ ވަނީ އިތުރުވެފައެވެ.
އާސަންދަ އާއި ސަބްސިޑީތަކަށް ކުރާ ހޭދަ ކުޑަކުރަން ރާއްޖެއަށް ވޯލްޑް ބޭންކުންވެސް ވަނީ ލަފާދީފަ އެވެ.
