ހުޅުމާލޭގައި ކާރަކާއި ވޭނަކާއި ބަހެއް ޖެހި އެކްސިޑެންޓެއް، ކާރު ޑްރައިވަރު ހޮސްޕިޓަލަށް ގެންގޮސްފިއެވެ.
ފުލުހުން ބުނީ، މި އެކްސިޑެންޓް ހިނގާފައި ވަނީ ހުޅުމާލެ ފޭސް އެކެއްގެ ރީތިގަސް މަގުގައި މިރޭ އިރާކޮޅު ކަމަށެވެ.
ކާރު ދުއްވި މީހާއަށް އަނިޔާވެފައި ވާ ކަމަށާއި ޓްރީޓޮޕް ހޮސްޕިޓަލަށް ގެންގޮސް ފަރުވާ ދެމުން ދާ ކަމަށެވެ. ނަމަވެސް އޭނާ އަށް ސީރިއަސް އަނިޔާއެއް ނުވާ ކަމަށް ފުލުހުން ބުނެއެވެ.
މި މައްސަލަ ފުލުހުން ތަހުގީގު ކުރަމުން އަންނަ އިރު، އެކްސިޑެެންޓް ހިނގަން މެދުވެރި ސަބަބު އަދި ސާފުވާ ގޮތެއް ނުވެއެވެ.
ހުޅުމާލޭގައި މައި މަގުތައް ފުޅާކޮށް ހުރި ނަމަވެސް މައިމަގުތަކާ ގުޅޭ ގޯޅިތަކުގައި ހުންނަނީ 4 ފުރޮޅުލީ ވެހިކަލަކަށް ދެވޭ ވަރުގެ ފުޅާ މިނެވެ.
ރީތިގަސް މަގަކީ މާލެ އިން ގޮސް ހުޅުމާލެ އަށް އަރަން އޮންނަ މަގު ކަމަށް ވާއިރު އެ މަގުގެ ސައިމާ ހިނގުމާ ގުޅޭ ހަތަރު އަނގޮޅިން ފެށިގެން ދެކުނަށް އޮންނަ ބައި ތަނކޮޅެއް ހަނި ނަމަވެސް އެއީ ދެކޮޅަށް ދުއްވޭހާ ފުޅާ މަގެކެވެ.
