އެމްޓީސީސީއާ ހަވާލުކޮށްގެން ފ. މަގޫދޫގައި ތަރައްގީކުރާ އެއާޕޯޓްގެ މަސައްކަތް ހުއްޓާލަން ސަރުކާރުގެ ރަސްމީ އެއްވެސް ފަރާތަކުން އަންގާފައި ނުވާ ކަމަށް އެ ކުންފުނިން ބުނެފިއެވެ.

މަގޫދޫގައި ތަރައްގީކުރާ އެއާޕޯޓުގެ މަސައްކަތް ނިމެން ކައިރިވެފައި ވަނިކޮށް އެ ރަށާ ވަރަށް ގާތުގައި އޮންނަ ނިލަންދޫގައި ވެސް އެއާޕޯޓެއް އަޅަން ރައީސް ޑރ. މުހައްމަދު މުއިއްޒު ނިންމުމާއި ގުޅިގެން މަގޫދޫގެ ބައެއް ރައްޔިތުން ވަނީ ކަންބޮޑުވުން ފާޅުކޮށްފައެވެ.

ރައްޔިތުންގެ ކަންބޮޑުވުންތަކާ ގުޅިގެން އެމްޓީސީސީގެ ސީއީއޯ ޒިޔާދު ވިދާޅުވީ މަގޫދޫ އެއާޕޯޓްގެ މަސައްކަތް ހުއްޓާލާފާނެތޯ ސުވާލު އުފައްދަން ފެށުމުން ހައިރާންކަން ލިބިވަޑައިގެންނެވި ކަމަށެވެ. އަދި އެ މަސައްކަތް އަދިވެސް ޕްރޮޖެކްޓު ލިސްޓުގައި އޮތްކަން ފާހަގަ ކުރައްވަމުން ޒިޔާދު ވިދާޅުވީ މި މަޝްރޫއުގެ މަސައްކަތް ހުއްޓާލުމަށް ރަސްމީ އެއްވެސް ފަރާތަކުން އަންގާފައި ނުވާކަމަށެވެ.

މީގެ އިތުރުން ޒިޔާދު ވިދާޅުވީ މި މަޝްރޫއުގެ އިތުރު ތަފްސީލު ދެއްވުމަށް މި ވަގުތު އުޒުރުވެރިވެ ވަޑައިގަންނަވާ ކަމަށާ، އެހެންނަމަވެސް މި މަޝްރޫއުގެ އެންމެ ސައްހަ މައުލޫމާތު ކޮންސްޓްރަކްޝަން އެންޑް އިންފްރާސްޓްރަކްޗާ އިން ލިބޭނެ ކަމަށެވެ.

މަގޫދޫ އެއާޕޯޓްގެ އަމަލީ މަސައްކަތްތައް ހުއްޓާލާފައި އޮންނަތާ ދެތިން ދުވަސްވެފައިވާ އިރު އެއާޕޯޓްގެ މަސައްކަތް ކުރާ ސަރަހައްދުގައި ރޭ އެ ރަށު ރައްޔިތުން ވަނީ ހޮޅިން ގޭޓެއް ހަދާފައެވެ.

ހަބަރު އެމްޓީސީސީ ފ. މަގޫދޫ