ރައްޔިތުންގެ މަޖިލީހުން ރުހުން ނުދިން ތިން މިނިސްޓަރުންނަށް އަލުން ރުހުން ދިނުމާ ގުޅޭ ގޮތުން މަޖިލީހުގެ ކައުންސެލް ޖެނަރަލް ފާތިމަތު ފިލްޒާ ރަސްމީ ލަފައެއް ދެއްވާފައި ނުވާ ކަމަށް މަޖިލިހުގެ އިދާރާއިން ބުނެފިއެވެ.
އިއްޔެ އެމްޑީޕީއިން އިއްޔެ ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ޕާލިމަންޓްރީ ގްރޫޕުގެ ލީޑަރު މުހައްމަދު ރަޝީދު (ބިގޭ) ވިދާޅުވީ މަޖިލީހުން ރުހުން ނުދިން ވަޒީރުން އަލުން އައްޔަންކޮށް އެ ބޭފުޅުންގެ ނަންތައް މަޖިލީހަށް ފޮނުވުމުގެ މަސައްކަތް ސަރުކާރުން ކުރަމުންދާ ކަމަށެވެ.
ގާނޫނު މާނަ ކުރައްވަން ތިއްބަވާ މަޖިލީހުގެ މެންބަރުންނާއި މަޖިލިސްގެ އަމީންއާމް އަދި މަޖިލިސްގެ ރައީސް މިކަމާ ގުޅޭ ގޮތުން މަޝްވަރާ ކުރެއްވި ބައްދަލުވުމެއްގައި އޭނާ ހުންނެވި ކަމަށާއި ރުހުން ނުލިބުނު ވަޒީރުންގެ ނަންތައް އަނބުރާ މަޖިލީހަށް ނުފޮނުވޭނެ ކަމަށް ކައުންސެލް ޖެނެރަލް ވިދާޅުވި ކަމަށެވެ.
އެކަމާ ގުޅިގެން "ދަ ޕްރެސް" އިން ކުރި ސުވާލަކަށް ޖަވާބުދެއްވަމުން މަޖިލީހުގެ ކޮމިއުނިކޭޝަން ޑިރެކްޓަ ހަސަން ޒިޔާއު ވިދާޅުވީ މިހާތަނަށް ރަސްމީ ލަފައެއް ލިބިފައި ނުވާ ކަމަށެވެ.
ސަރުކާރުގެ ކެބިނެޓުގައި ތިބި މިނިސްޓަރުންނަށް ރުހުން ދިނުމާ ގުޅޭ ގޮތުން ނެގި ވޯޓުން ތިން މިނިސްޓަރުންނަށް ރުހުން ނުދިނުމަށް މަޖިލީހުން ވަނީ ނިންމާފައެވެ. އޭގެތެރޭގައި ހިމެނެނީ ބަންޑާރަނައިބު އަހްމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަދި ހައުސިން މިނިސްޓަރު ޑރ. އަލީ ހައިދަރެވެ.
ރުހުން ނުދިނުމަށް މަޖިލީހުން ނިންމި ނަމަވެސް މިހާރު އެ މިނިސްޓަރުން ވަނީ އެ މަގާމުތަކަށް އަލުން އައްޔަންކުރައްވާފައެވެ.
