މަގުތަކުގައި ފެންބޮޑުވެފައި ވާތީ ބާރަށް ވެހިކަލް ނުދުއްވުމަށް ފުލުހުން އިލްތިމާސްކޮށްފިއެވެ.
މިހާރު މުޅި ރާއްޖެއަށް ކުރަމުންގެންދާ ވިއްސާރާގައި ފެންބޮޑުވެ ގެ ތަކަށްވެސް ގެއްލުން ލިބިފައިވާއިރު ރޭ ހުއްޓާނުލާ ވާރޭ ވެހުމުގެ ސަބަބުން މުޅި މާލޭގައިވެސް ވަނީ ފެންބޮޑުވެފައެވެ.
ފުލުހުން ވަނީ ގަދަ ވަޔާއެކު މިހާރު ރާއްޖެއަށް ކުރަމުންދާ ވިއްސާރަ އާ ގުޅިގެން މަގުތަކުގައި ފެންބޮޑުވެފައި ވާތީ، މަގުތަކުގައި ބާރު ސްޕީޑުގައި ވެހިކަލު ނުދުއްވުމަށާއި ޒަރޫރީ ދަތުރުތައް މެނުވީ މިވަގުތު ނުކުރެއްވުމަށް އިލްތިމާސްކޮށްފައެވެ.
ގަދަ ވަޔާއެކު ކުރަމުންދާ ވިއްސާރައާ ގުޅިގެން ބުރިޖު އަދި ހައިވޭގައި ފެންބޮޑުވެ، ވަޔާ ވެއްޔާއެކު ކުނި ހުރުމާއެކު ބުރިޖު އަދި ހައިވޭ ބޭނުންކުރައްވާ ފަރާތްތައް އެކަމުގައި ސަމާލުވުމަށްވެސް ފުލުހުން ވަނީ އެދިފައެވެ. އަދި އަދި ކޮންމެހެން ކުރައްވަންޖެހޭ ޒަރޫރީ ދަތުރުތަކަށް ހަތަރު ފުރޮޅުލީ އުޅަނދު ބޭނުންކުރުމަށްވެސް ފުލުހުން ވަނީ އިލްތިމާސްކޮށްފައެވެ.
މީގެ ކުރިންވެސް ވިއްސާރަ ދުވަސްވަރުގައި ބްރިޖާއި ހައިވޭގައި އެކްސިޑެންޓްތައް ހިންގާ، ގިނަ ބަޔަކަށް އެކި ވަރުގެ އަނިޔާ ލިބުނު ހާދިސާތައްވެސް ހިންގާފައި އެބަހުއްޓެވެ.
މިހާރު ރާއްޖޭގެ އެކި ހިސާބުތަކަށް ކުރަމުން އަންނަ ވިއްސާރާގައި، ރަށްރަށުގައި ފެންބޮޑުވުމުގެ ހާދިސާތައް ކުރިމަތިވަމުން އަންނައިރު މޯލްޑިވްސް މީޓިއޮރޮލޮޖިކަލް ސާވިސް (މެޓް) އިން ވަނީ މިރޭ 9:30 ހަމައަށް ޅ. އަތޮޅުން ފެށިގެން ވ އަތޮޅަށް ޔެލޯ އެލާޓް ނެރެފައެވެ. އެ ސަރަހައްދުތަކަށް ޔެލޯ އެލާޓް ނެރެފައިވަނީ ބޯކޮށް ވާރޭވެހުމާއެކު ގުގުރުން އަދި ވިލާގަނޑުގައި ގަޑިއަކު 45 މޭލަށް ވައި ގަދަވާނެ ކަމަށް ލަފާކޮށެވެ.
