މިހާރު ރާއްޖެއަށް ކުރަމުން ދާ ވިއްސާރައިގައި، ކްރިމިނަލް ކޯޓަށް ފެންވަދެ އެ ކޯޓުގެ ސާވާއަށް އަސަރުކޮށް ކޯޓުގެ މަސައްކަތްތަކަށް ވަަރަށް ބޮޑަށް ދަތިވެއްޖެއެވެ.
ކްރިމިނަލް ކޯޓުން ބުނީ މިއަދު ހެނދުނުން ފެށިގެން ކްރިމިނަލް ކޯޓުގެ ސީލިންގުން ފެންވަދެ ކޯޓުގެ ސާވާ އެއްކޮށް ހަލާކުވެެފައިވާކަމަށެވެ. އެހެންކަމުން ކޯޓުގެ އިންޓަނެޓުގެ ހިދުމަތް މެދުކެނޑި، ކަރަންޓް މައްސަލަތައްވެސް ދިމާވެފައިވާ ކަމަށެވެ.
އެހެންކަމުން ކްރިމިނަލް ކޯޓުގެ އިދާރީ މަސައްކަތްތައްވެސް މިއަދު ކުރިއަށް ގެންދެވިފައި ނުވާއިރު ކޯޓުން ބުނީ މިއަދު ބާއްވަން ޝެޑިއުލްކޮށްފައިވާ ހުރިހާ ޝަރީއަތްތައް ވެސް ކެންސަލްކޮށްފައިވާ ކަމަށެވެ. އެހެންނަމަވެސް ބަންދުގެ މުއްދަތު ޖެހުމުގެ މަޖިލިސްތައް ބާއްވަމުންދާ ކަމަށް ކޯޓުން ވަނީ ބުނެފައެވެ.
ކްރިމިނަލް ކޯޓު ހިންގާ އިމާރާތް ބަދަލުކުރުމަށް ޖުޑީޝަލް އެޑްމިނިސްޓްރޭޝަން ޑިޕާޓްމެންޓު (ޑީޖޭއޭ)އިން މީގެކުރިންވެސް މަސައްކަތްތަކެއް ކޮށްފައިވާއިރު މިދިޔަ އަހަރުވެސް އެ ކޯޓުގެ ތަނބެއް ވެއްޓުމާ ގުޅިގެން ވަނީ ގެއްލުންތަކެއް ވެފައެވެ.
ރާއްޖޭގެ މޫސުން ވަރަށް ބޮޑަށް ގޯސްވެ ޔެލޯ އެލާޓް ނެރެފައިވާއިރު މެޓް އޮފީހުން ވަނީ ގުގުރުމާއެކު، ބޯކޮށް ވާރޭވެހި އަދި ގަޑިއަކު 45 މޭލަށް ވައި ގަދަވެ، ކަނޑުތައް ވަރަށް ގަދަ ވާނެކަމަށް ލަފާކޮށްފައެވެ.
