އެކި އިދާރާތަކާއި ވުޒާރާތަކުގައި މަސައްކަތް ކުރައްވާ ބޭފުޅުންގެ މުސާރަ ބޮޑު ކުރީ އެހެން ޕާޓީތަކުގެވެސް ތާއީދު ހިމެނޭހެން ސަރުކާރުންވެސް އެކަމަށް އެދިގެން ކަމަށް އެމްޑީޕީގެ ޕީޖީ ލީޑަރުންގެ ގުރޫޕުން ބުނެފިއެވެ.
މަޖިލީހުގެ ސުޕަ މެޖޯރިޓީކަން ވެސް ކުރަމުންދާ އެމްޑީޕީގެ ޕީޖީ ލީޑަރުންގެ ގުރޫޕުން މިއަދު ބޭއްވި ހާއްސަ ޕްރެސް ކޮންފަރެންސްގައި ވާހަކަ ދައްކަވަމުން ދާންދޫ ދާއިރާގެ މެންބަރު ޔައުގޫބް އަބްދުﷲ ވިދާޅުވީ، ވަކި ބައެއްގެ މުސާރަ ބޮޑު ކުރުމަކީ މަޖިލީހަށް ލިބިގެންވާ ބާރެއް ކަަމަށާއި މުސާރަ ބޮޑު ކުރަން ބޭނުންވާ ފަރާތްތަކުގެ މުސާރަ ބޮޑު ކުރަން ބޭނުންވާ ނަމަ އެދެން ޖެހެނީވެސް މަޖިލީހުގެ އިދާރާއަށް ކަމަށެވެ.
އަދި މުސާރަ ބޮޑު ކުރުމުގެ ޕްރޮސެސްގެ ތެރެއިން މި ސަރުކާރުންވެސް އެކަމަށް އެދިފައިވާ ކަމަށް ޔައުގޫބް ވިދާޅުވިއެވެ. އެގޮތުން ނޮވެމްބަރު، 21 ގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ސޮއި ކުރައްވާ ރައްޔިތުން މަޖިލީހަށް ފޮނުއްވެވި ސިޓީއެއްގައި ޕީސީބީ ބޯޑުގެ ރައީސް އަާއި ނައިބު އަދި ބޯޑުގެ މެންބަރުންގެ މުސާރަ ބޮޑު ކޮށްދިނުމަށް އެދިވަޑައިގެންފައިވާ ކަމަށް ޔައުގޫބް ވިދާޅުވިއެވެ.
"ބޯޑުގެ ރައީސްގެ މުސާރަ 55،000 ރުފިޔާ ނައިބު ރައީސްގެ މުސާރަ 45،000 ރުފިޔާ އަދި ބޯޑު މެންބަރުންގެ މުސާރަ 20،000 ރުފިޔާ އަށް ބަދަލު ކޮށްދިނުމަށް އެ ސިޓީގައި ރައީސް މުއިއްޒު އެދިވަޑައިގެންފައިވޭ" ޔައުގޫބް ވިދާޅުވިއެވެ.
ސަރުކާރުންވެސް މުސާރަ ބޮޑު ކުރުމަށް އެދިފައިވާ ކަން ފާހަގަ ކުރައްވާ ޔައުގޫބް ވިދާޅުވީ މި ހިނގަނީ ދައުލަތެއް ކަމަށާއި ވަކި އުސޫލުތަކަާއި ހަމައެއް ދައުލަތް ހިންގުމުގައި އޮންނަން ޖެހޭ ކަމަށެވެ. އެގޮތުން ވަކި މިނިވަން މުއައްސަސާއެއްގެ މުސާރަ މާ ބޮޑުވެ އަނެއް މިނިވަން މުއައްސަސާއެއްގެ މުސާރަ މާ ބޮޑަށް ކުޑަ ވެއްޖެ ނަމަ އުސޫލެއް ހަމައެއް ނެތް ކަމަށް ޔައުގޫބް ވިދާޅުވިއެވެ.
އަދި އެ މައްސަލަތައް އެއް ހަމަ ކުރަން ބަޖެޓުގައި 500 މިލިއަން ރުފިޔާ ހިމެނި ކަމަށާއި އެހެންކަމުން, މި ބަދަލާއެކު ވެސް އެއްވެސް ވަރަކަށް ބަޖެޓަށް އުނިއިތުރެއް ނާންނާނެ ކަމަށް އޭނާ ވިދާޅުވިއެވެ.
މުސާރަތަކަށް ބަދަލު ގެންނަން ނިންމީ ކޮމިޓީގެ މެންބަރުންގެ ފުރިހަމަ އިއްތިފާގުން ކަމަށް ޔައުގޫބް ވިދާޅުވިއެވެ. އެގޮތުން މި ގޮތަށް ފާސް ކުރުމަށް ޑިމޮކްރަޓްސް އާއި ސަރުކާރު ހިންގާ ޕީއެންސީގެ އިތުރުން އެމްޑީއޭގެ ވެސް ރުހުން އޮތް ކަމަށް އޭނާ ފާހަގަ ކުރެއްވިއެވެ.
"ޑިމޮކްރަޓްސްގެ ފަރާތުން ހަސަން އަފީފް އާއި ސަރުކާރުގެ ފަރާތުން ޕީއެންސީގެ ޕީޖީ ލީޑަރު އެއްކޮޅަށް ވޯޓު ދެއްވި. އަދި އެމްޑީއޭގެ ފަރާތުން ވޯޓުގައި ބައިވެރިވި ނުވެވުނު ނަމަވެސް ރުހުން އޮތް. ޑިމޮކްރަޓްސްގެ އިލްޔާސް ލަބީބް ވެސް ރުހުން އޮތް ކަމަށް ވާހަކަ ދެއްކެވި ނަމަވެސް ވޯޓުގައ ބައިވެރިވެވަޑައި ނުގަތް ކޮމިޓީ ދޫ ކުރައްވާ ނިކުމެވަޑައިގަތީ" އިލްޔާސް އެކަން އެގޮތަށް ކުރެއްވީ ވެސް އެކަމަށް ނޫނެކޭ ނުބުނާން ކަމަށް ޔައުގޫބް ވިދާޅުވިއެވެ.
މުސާރަ ބޮޑުކުރަން ކޮމިޓީން ފާސްކުރީ، މަޖިލިސް މެމްބަރުންގެ އިތުރުން ރައީސް އާއި ނައިބު ރައީސް އަދި ވަޒީރުންނާއި ކޯޓުތަކުގެ ފަނޑިޔާރުންނާއި ގާޒީންނާއި މެޖިސްޓްރޭޓުންނާއި ސަރުކާރު އިދާރާތަކުގެ ޑިރެކްޓަރުންނާއި ބޯޑު މެމްބަރުންނާއި ސިޓީ ކައުންސިލު މެމްބަރުންގެ އިތުރުން ރަށު ކައުންސިލަރުންގެ މުސާރަ އެވެ.
ކޮމިޓީން މިގޮތަށް ފާސް ކުރަން ނިންމި ނަމަވެސް މިކަމުގެ ފަހުގެ ނިންމުން ނިންމާނީ ކޮމިޓީ ރިޕޯޓަށް ބަހުސް ކުރުމަށްފަހު މަޖިލީހުގެ ތަޅުމުންނަގާ ވޯޓާއެކު އެވެ. ކޮމިޓީގެ މި ނިންމުމާ ގުޅިގެން އާންމުންދަނީ ފާޑު ކިޔާ ނުރުހުން ފާޅު ކުރަމުންނެވެ.
