ކުޅުދުއްފުށީ ސިޓީގައި ފައިލޭރީއަށް ސްކްރީންކުރުމާ، އަދި މައުލޫމާތު ދިނުމުގެ ސެޝަނެއް ބޭއްވުމަށް ކުޅުދުއްފުށީ ރީޖަނަލް ހޮސްޕިޓަލުން ނިންމައިފިއެވެ.
ކުޅުދުއްފުށީ ރީޖަނަލް ހޮސްޕީޓަލުން ބުނީ ފައިލޭރިއާ ބައްޔާ ބެހޭގޮތުން އެ ރަށުގައި ދިރިއުޅެމުން ދާ އިންޑިއާގެ ރައްޔިތުންނަށް މައުލޫމާތު ދިނުމުގެ ސެޝަން ކުރިއަށް ދާނީ މިރޭ 20:20 ގައި ހދ. އަތޮޅު ތައުލީމީ މަރުކަޒުގައި ކަމަށެވެ. މި ސެޝަން ކުރިއަށް ދާނީ އިންޑިއާ ރައްޔިތުންނަށް ފަސޭހަކަމާއެކު މައުލޫމާތު ސާފުވާނެ ގޮތަށް ކުރިއަށް ގެންދިއުމަށް ހިންދީ އަދި އުރުދޫ ބަހުންނެވެ.
ރާއްޖެއިން ނައްތައިލާފައިވާ ފައިލޭރިއާ ބަލީގެ ކޭސްތަކެއް ކުޅުދުއްފުށިން ފެނުމާ ގުޅިގެން އެކަމާއި ގުޅިގެން ކުރަންޖެހޭ މަސައްކަތްތައް ކުރުމަށް ހާއްސަ ޓާސްކް ފޯހެއް ވަނީ އެކުލަވާލާފައެވެ. އަދި ފައިލޭރީއާ އަށް އާންމުން ހޭލުންތެރި ކުރުމާ އެކު ބިދޭސީން ފައިލޭރީއަށް ޓެސްޓްކުރުމުގެ މަސައްކަތްވެސް އެ ރަށުގައި އަންނަނީ ކުރަމުންނެވެ.
އެޗްޕީއޭ އިން ބުނީ މި މަހުގެ 18 ވަނަ ދުވަހާ ހަމައަށް ކުޅުދުއްފުށީގައި ދިރިއުޅޭ 295 ބިދޭސީ މަސައްކަތު މީހުން ސްކްރީން ކޮށްފައި ވާކަމަށެވެ. އަދި މި ތާރީހުގެ ނިޔަލަށް ޕޮޒިޓިވް ވެފައިވާ 19 ބިދޭސީންނަށް ބޭސް ދިނުމުގެ މަސައްކަތް ވެސް ކުރަމުން އަންނަކަމަށް ވެސް އެޗްޕީއޭ އިން ވަނީ ބުނެފައެވެ.
ރާއްޖޭން އެންމެ ފަހުން ފައިލޭރިއާ ކޭސްއެއް ރިޕޯޓުކޮށްފައި ވަނީ 2004 ވަނަ އަހަރު ލ. ފޮނަދޫއިންނެވެ.
